Ka Longïing jongka NPP ka skhem bad ïatylli yn ym don jingktah ïa ka sorkar MDA : Dy CM

Shillong, Nailur 25 : U Symbud Myntri Rangbah ka jylla bad u National Vice President ka NPP u ma Sniawbhalang Dhar mynta ka Sngi Thohdieng u pynshai ba kiei kiei kiba sa phriang khubor ha kine ki khyndiat sngi halor ki MLA ka NPP ki dei tang ki khubor hamsaia bad kim don kano kano ka jingshisha.
ïa kane u la pynshai halor ka jingsaphriang khubor ha kylleng ka jylla ba ki MLA ka NPP ki la leit sha Delhi banpynïasoh noh sha ka BJP bad kane ka la mih hadien ba ki 8 ngut ki MLA ka UDP ki leit pynïasoh bad ka BJP. U la ong “ Ngi baroh 33 ngut ki MLA ki skhem bad ïatylli bad kane ka sorkar MDA ba ïalam da u Myntri Rangbah u Conrad K Sangma kan neh haduh kaba kut bad ka long kawei haduh ba kut kane ka samoi”.
U ma Sniawbha u la kren ïa kane mar syn wan phai na Delhi ryngkat bad u Myntri Rangbah u Conrad K Sangma bad u Symbud Myntri Rangbah u bah Prestone Tynsong bad u la ong ba ka jingleit Delhi ka dei halor ki kam kiba ïadei bad ka sorkar pdeng.
“ Phi la ïohi ïa ki khubor hamsaia kiba saphriang kylleng bad nga kwah ban pynshai ba kam don kano kano ka jingshisha namar ngi ïalong kawei hapoh ka NPP. Ngi long ka ïing kaba ïatylli khamtam ma ngi ki lai ngut ki nongïalam kata naduh u Myntri Rangbah u Conrad K Sangma , u bah Prestone Tynsong bad ma nga kiba dei ki Symbud Myntri Rangbah” ong u ma Sniawbha.
U la ther tyngeh ïa kito kiba pynmih khubor ba 22 ngut ki MLA ka NPP ki don ha Delhi ban ïakynduh ïa ki nongïalam ka BJP. “ Nga la ïohi hynnin ka sngi ba mih ki khubor ba 22 ngut ki MLA ka NPP ki don ha Delhi ngan ïathuh ïa phi ngi don tang ma ngi lai ngut ha Delhi. Nga sngewsynei ïa kito ki lad pathai khubor kiba pynmih ïa kum kito ki khubor hamsaia ba khlem nongrim ha ki social media namar ki paidbah kin rkhie beiñ ïa ki. Ngi baroh 33 ngut ngi ïalong kawei bad kine ki jingkynnoh ki long kiba bakla suda” ong u ma Sniawbha.
Halor ka jingpynïasoh ki 8 ngut ki MLA ka UDP sha ka BJP u la ong ba kam don jingktah ei ei ruh em ïa ka sorkar MDA. Kane ka jingpynïasoh ka dei ka kam jong ki ar tylli ki seng saiñ pyrthei ka BJP bad ka UDP. Kam dei ïa nga ban batai stad na ka bynta jongki. Kaei kaba nga kwah ban ong ba kan ym don kano kano ka jingktah ïa ka sorkar MDA. Ka MDA kan ïaineh haduh ba kut bad ki number jong ki MLA jongka ruh kin ïai neh kumjuh. Kine kiba pynïasoh ki leit pynïasoh da kaba ki don hi hapoh ka sorkar, Baroh ki seng saiñ pyrthei ki kwah ban pynkhlaiñ ïalade ba kam don kano kano ka jingkhang ïa kata” ong biang u ma Sniawbha.
“ Ngi la synshar mynta la phra snem tam kata naduh u 2018 haduh 2023 bad ngi sdang tang 19 ngut ki MLA bad mynta ka kynti ngi la poi sha ka 33 ngut ki MLA. Nga ai khublei ïa baroh ki seng saiñ pyrthei kiba ïatrei lang ban pynkhlaiñ bad pynskhem ïa ka jinsynshar jong ngi” u la ong.
U la kyntait ruh ba ka don kano kano ka jingdawa na ka BJP ban kyntiew ïa ka bhah shuki myntri hapoh ka kynhun myntri. “ Ym don kano kano ka jingdawa na ka BJP ban kyntiew ïa ka bhah shuki bad baroh kin ïai neh beit kumjuh” ong u ma Sniawbha.
Haba la kylli hato ki paidbah ki lah ban pdiang ïa ka BJP ha u 2028, u la ong ba ïa kata ym pat lah ban ong ïa mynta.
U la ong “ Ka Meghalaya ka dei ka jylla ba bun ki Khristan bad ki paidbah ki tip, nang bad stad ban jied. Mynta la 40 haduh 53 snem ki paidbah kim pat pdiang satia ïa ka BJP ha Meghalaya. Nga tharai kane kan ïai bteng beit. Kine kiba pynïasoh ki lah ban shu pynïasoh shipor mynta kumba shisnem tam ei ei hynrei ki paidbah kin sa ai ïa ka rai ha u 2028. Ngi ha ka NPP ngi la thikna ba ngin tam beit ïa ka 33 ngut ki MLA ha u 2028”.