Shillong, Nailur 25: Ka India ka la lah ban ïakhaid mar 1-1 kol pyrshah ïa ka Panama (kaba wan kyrdan ba 44 ha ka thup jong ka FIFA) ha ka jingïalehkai paralok ba nyngkong hynne ka miet sngi Thohdieng ha Bengaluru.
Ka Panama ka la ïakhun ha ka World Cup tang katto katne bnai mynshwa bad ka la don katto katne ngut ki nongïalehkai na katei ka kynhun ha kane ka jingïalehkai pyrshah ïa ka India.
Kane ka dei ka jingïakynduh kaba nyngkong hapdeng kine ki arliang mamla, bad ka jingïakhun kaba 14 jong ka India pyrshah ïa ki ri jong ka CONCACAF. Ka Panama ka la long ka ri kaba phra jong ka CONCACAF ban ïakhun pyrshah ïa ka India.
Ka India ka la pynkyndit da kaba lamkhmat nyngkong na ka kol jong u Ryan Williams (41’) hynrei u Omar Valencia (68’) u la pynïakhaid ban pyllait ïa ka Panama na ka jingshah rem ha ka India kaba don ha ka kyrdan kaba 138 ha ka thup jong ka FIFA.
U Ricky John Shabong ka Meghalaya ruh u la ïoh ïa ka lad ban sdang ha kane ka kynhun jong u Khalid Jamil, bad u la ïalehkai haduh ka minit kaba 73 hashwa ba un shah bujli noh.
Ka kol jong ka India ka la urlong hadien ba u Akash Mishra u la pashat shakhmat najrong ïa ka bol bad u Ryan u la mareh biang por ban tam ïaki rangap dien jong ka Panama, nangta u la pyrshang da kaba jai ban pyllait lyngba u rangap kol ka liang pyrshah, u Marcos Reyes.
Ka liang pyrshah ka la ïoh ïa ka kol pynïakhaid ha ka minit kaba 68 da ka jingpyrshang kaba jam na u Valencia kaba u rangap kol ka India u la shu ang lyngngoh.
Ka India kan ïakhun pyrshah sa ïa ka Brazil ha ka jingïalehkai paralok kaba bud ha Kolkata ha ka 03 tarik Risaw, ka ban bud sa ka jingïakhun pyrshah ïa ka Uruguay ha ka 06 tarik Risaw.
Ka kynhun India ba mih madan pyrshah ïa ka Panama: Gurpreet Singh Sandhu (GK), Abhishek Singh Tekcham, Anwar Ali, Bijoy Varghese, Akash Mishra (sub Pramveer 90’), Vikram Partap Singh (sub Edmund Lalrindika 73’), Lalengmawia Ralte, Ricky Shabong (sub Anirudh Thapa 73’), Ashique Kuruniyan (sub Jay Gupta 85’), Ryan Williams (sub Sahal Abdul Samad 73’), Manvir Singh
