TSA 2nd Division 2026: Jop ka Shillong Police bad ka Maya Club Wahiajer; Ïakhaid kawei ka jingïakhun

Jowai, Nailur 25: Ka Shillong Police bad Maya Club Wahiajer ki la jop ïa la ki jong ki jingïalehkai jong ka lympung phutbol (L) Joybell Suiam Memorial Football League 2026 haka kyrdan Second Division bala pynïaid da ka Thadlaskieñ Sport Association, kiba la long hynne ka sngi Thohdieng (25 tarik u Nailur, 2026) ha madan Wahiajer Multi Sports Complex Stadium.
Ka Shillong Police kala jop da 3-0 kol ïaka Mupliang RC Dreaming, katba ka Maya Club Wahiajer kala pynliem da 5-3 kol ïaka Mukhla Wahchnong.
Katba ka jingïakhun kaba nyngkong jong kane ka sngi ka la kut ha ka jingïakhaid hapdeng ka Tympang SC Wahiajer bad ka Nongdhar Nongthymme, ha kaba baroh arliang ki la thep mar 1-1 kol. Ka Tympang SC Wahiajer ka la pynkhihjar nyngkong lyngba u Rupaya Dkhar (20’) hynrei ka Nongdhar Nongthymme ka la pynïakhaid lyngba u Edris Suting (48’).
Haba phai sha ka jingïakhun kaba bud, ka Shillong Police kala pynkhihjar lyngba u Angelious Mukhim (35’), u Iohboklang Kshiar (38’) bad u Iohbor Nonglyer (67’) ban pynliem ïa ka Mupliang RC Dreaming.
Katba ha ka jingïakhun kaba lai ka Maya Club Wahiajer kala pynkhihjar lyngba u Shamki Mukhtieh (14, 66 & 69’) uba la thep hat trick, u Embok Pale (55’) bad u Preshan Supuh (71’) ban pynliem noh da 5-3 kol ïaka Mukhla Wahchnong. Ïa ki kol na ka Mukhla Wahchnong la thep da u Player Suna (2’) bad u Rikmenlang Sumer (30’) bad ka kol ba la kum thep hi da u Kularmi Lhuid (OG) haka minit ba 39.
Ki jingïakhun ha kane ka sngi Saitjaiñ (26/09/2026) ki long: Por 9 baje mynstep ka Mukhla Sohshrieh kan aireng pyrshah ïaka Umladang Shiparalok FC; nangta ha ka Por 11 baje mynstep ka Laru SC kan ïakhun pyrshah ïaka Mainroad SC Wahiajer.