Shillong, Naiwieng 10 : U rangïalehkai pyni dohksah na ka jylla, Bah Bransley D Nongkynrih na Iron House Gym ula ïoh ban khur ïa ka Takma Ksiar ha ka Classic Physique – A Category ha ka NPC Worldwide Kazakhstan Pro Qualifier 2026, kaba la long ha ka 07 tarik u Naiwieng 2026 ha Almaty, Kazakhstan.
Kane ka jingjop ka la wan hadien ka jinglah jong u ban leh bha ha ka Sheru Classic NPC Regional North India Championship ha Chandigarh ha ka 11 tarik u Risaw 2026, ha kaba u la jop ïa ki Overall Titles ha baroh ar tylli ki jingïakop, kata ka Classic Physique bad Bodybuilding. Hadien kane, u Bransley u la bteng ban jop wat ha ki jingïakop ha ka kyrdan International.
Ka NPC Worldwide Pro Qualifier ka dei ka rynsan kaba kongsan ïa ki nongïakop pyni dohksah kiba dang sdang ïa ka kam, kiba kwah ban ïoh ïa ka IFBB Professional League Pro Card bad ban jam sha ka kyrdan jingïakop professional, da ka jingthmu kaba khatduh ban poi sha ka rynsan ba pawnam jong ka Mr. Olympia.
Ka jingjop takma ksiar jong u Bah Bransley ka pyni ïa ka jingaiti lut jong u, ka jinglong ryntih, ka jingtrei shitom bad ka jingminot jong u ha ka kam pynheh dohksah.
Na ka liang u Bah Bransley u la pynpaw da kaba ong ba u dap da ka jingsngewnguh Dr. Mrs. M. Ampareen Lyngdoh, ka MLA jong ka thaiñ khamtam ïa u kpa jong u, u Bah Khrawbok Nongum bad baroh ki dkhot jong ka Iron House Gym kumjuh ki nongkyrshan pisa kiba la noh kylluid mynsiem kaba la pynlong ban lah ïa u ban lah ban leit ïashim bynta ha kane ka jingïakop ha ka kyrdan International.
U la pynpaw ruh ba kane ka jingjop kan ym long kaba lah ban urlong lada ym don ka jingïatreilang, ka jingkyrshan bad ka jingshaniah jong baroh kito kiba la ïeng kyrshan ïa u ha baroh kawei ka jingïaid lynti jong u.
“Kane ka jingjop kam dei tang ka jingjop shimet jongnga hynrei ka long ruh ka jingai mynsiem ïa ki samla bad ki nongïalehkai kiba don ka jingangnud na Meghalaya.
Ka pyni ba da ka jingkut jingmut, ka jingtrei shitom bad ka jingkyrshan kaba biang, ki nongïalehkai na ka jylla jong ngi ki lah ban ïashim bynta bad jop ha ki rynsan jingïakop ha ka pyrthei,” u la pynpaw.
