SPL 2026: Lehnohei ka kabu ban kiew kyrdan nyngkong ka Mawlai naba ïakhaid bad ka Nangkiew Irat

Shillong, Nailur 25: Ka Mawlai ka la pynlehnohei ïa ka kabu ksiar ban kiew biang sha ka kyrdan ba ha khlieh duh jong ka Shillong Premier League 2026 da kaba ïakhaid biang khlem kol (0-0), ha kane ka kynti pyrshah ïa ka Nangkiew Irat.
Ha ki 32 tylli ki jingïalehkai jong ka SPL 2026 ki don tang 6 tylli ki jingïakhun ba la kut ha ka jingïakhaid, bad ka Mawlai ka la mad ïa kane haduh lai sien, ha kaba baroh ki long kiba khlem kol. Katba ki ar tylli kiwei pat ba ka la ïakhaid ki long pyrshah ïa ki kynhun ba kham khlaiñ kum ka Langsning bad ka Shillong Lajong, ka jingbym lah ban jop pyrshah ïa ka Nangkiew Irat kan long kaba pynduh jingkyrmen haduh katta katta, namar kadei ka kynhun kaba shong ha thmier jong ka thup kyrdan ban shah sloit.
Kane ka resol kamut ba ka Mawlai kan dang neh ha ka kyrdan ba lai da 12 poiñ na ki hynriew tylli ki jingïalehkai. Ka Lajong ka lamkhmat ha khlieh duh da 14 na ki 7 sien ïakhun katba ka Langsning kaba ïada ïa ka burom lahduh ka wan ba-ar da 13 poiñ na ki 6 sien ïakhun. Katba ka Nangkiew Irat ka la kiew shi kyrdan sha ka kyrdan ba hynñiew bad mynta ka la kamai 8 poiñ. Hynrei ka la ïalehkai kham bun sien (8 sien) ban ïa kiwei pat ki kynhun.
Watla katta ka Mawlai ka dang sah khlem shah rem bad ka la shah thep tang shi kol baroh shi samoi, hynrei kaba duna ka long tang shakhmat namar ka la ïoh ban thep kham duna kol (8) haba nujor bad kiwei pat ki kynhun kiba don ha ka thup kyrdan Top 5.
Shuwa ban sdang ïa kane ka jingïalehkai ha SSA Stadium, la ïoh ban pynlong ïa ka jingsngap jar kaba shi minit kum ka dak ka jingsngewlem ïa ka jingkhlad noh u dkhot barim ka Shillong Sports Association Council u bah Shandalang Talang.
Ka jingïakhun ha kane ka sngi Saitjaiñ (26 tarik Nailur, 2026) yn sakhi ïa ka Langsning ka ban ïoh ïa ka lad ban kurup biang ïa ka kyrdan ba nyngkong lada ka lah ban pynliem ïa ka Mylliem. Kane ka jingïalehkai kan sdang ha ka por 3 baje nohphai sngi.