Jowai, Naiwieng 09: Ka Musniang SC ka la pynthikna ïa ka jaka jong ka ha ka phainal jong ka lympung phutbol First Division League 2026 da kaba jop ïa ka jingïakhun semi final kaba ar bad kaba khatduh hynne ka sngi Nyngkong pyrshah ïa ka Khliehriat West YWSC.
ïa kane ka lympung kaba la tip ruh kum ka Thomas Nongtdu Memorial Trophy la pynïaid daka East Jaiñtia Hills District Football Association (EJHDFA) ha madan Artificial Diengshynrum, Khliehriat.
Haba phai sha ka jingïakhun ka kynhun ïalehkai jong ka Musniang SC kala pynliem noh ïaka Khliehriat West YWSC da tang 1-0 ban pynskhem ïa la ka jong ka jaka ha ka phainal.
Hadien ka jingïakhun kaba khlem kol la jan baroh kawei ka jingïalehkai u Jespar Lamare u la ïoh ban thep ïa ka namtam ha ka minit pynjlan shuwa ban kut (90+1’). Lyngba kane ka jingjop ka Musniang SC kala ïoh ban rung syndon sha ka jingïakhun Final jong kane ka lympung.
Ha kaba kut jong ka jingïakhun ïa ka khusnam Player of the Match la khur da u Dasalanwanmi Malang naka Musniang SC.
Kane ka jingjop ka la pynthikna ruh ïa ka Musniang SC ban kiew kyrdan sha ka Super Division ha ka aiom ïalehkai ban wan (next season).
Hadien ka jingpyndep ïa baroh ar tylli ki semi final mynta ka sah satang kawei ka jingïakhun ban rai ïa ka lahduh jong kane ka lympung, ha kaba ka jingïakhun kan long hapdeng ka Rymbai Synrangshahkhain SC pyrshah ïa ka Musniang SC, ïa ka tarik bad ka por yn sa pynban hadien.
