Jowai, Naiwieng 09: Mynta ka sngi (09-11-2026) la pynlong ïa ka Semi-Final kaba ar hapdeng ka Nongtalang Mission Youth Club pyrshah ïa ka New Nonglamin Sports Club jong ka 9th Inter-Dong Football Tournament bala pynïaid da ka Seng Samla Nongtalang Khlachympa Sports and Cultural Club Nongtalang 2026 haka por 2:30 baje nohphai sngi ha madan Nongtalang.
Ha kane ka jingïaknieh rung sha ka Final ka Nongtalang Mission Youth Club kala pynliem ïa ka New Nonglamin SC da 1-0 kol, ha kaba ïa kane ka goal la ïoh ban thep da u Mahrhendiam Lyngdohgiri (Nongtalang Mission Youth Club) haka kylla step jong ka jingïalehkai bad haka kylla miet pat jong ka jingïalehkai ka New Nonglamin SC kala pyrshang met bad mynsiem ban thaw ki lad ki lynti ban ïoh thep kol hynrei haduh bala kut kim shym ïoh lad ban pynphai kylla.
Haba phai sha ka jingïalehkai mynta ka sngi ka long kaba itynnad shisha bad pynhun ïa ki nongpeitkai baroh arliang ha ryngkat ki jingrisa, jingkynhoi na la ki jong ki jong ki nongkyrshan.
Lyngba kane ka jingjop ka Nongtalang Mission Youth Club kala ioh rung sha ka Final jong kane ka Tournament bad kadei ruh ka sien kaba lai ïaka ban poi sha ka Final.
Ïa ka Namtam (Man of the match) la ïoh da u Keepme Safely Lamin (Nongtalang Mission Youth Club).
Ka Final kan long hapdeng ka Nongtalang Mission Youth Club pyrshah ïa ka Amlariang Sports Club bad ïaka tarik yn sa pynbna pat hadien bala pynbeit.
