Ngin jop palat 19-20 ngut ki kyrtong ha ka elekshon MDC ban wan ha rilum Garo: Bah Prestone
Kiew ka NPP sha ka 21 ngut ka jingbun paid ha GHADC
Shillong, Naiwieng 08 : U State President ka NPP Bah Prestone Tynsong u la kob ba ka party ka don ka jingkyrmen ba ki lah ban jop palat ïa ka 19- 20 ngut ki kyrtong ha ka elekshon MDC kaban sa long shen ha Garo Hills Autonomous District Council.
Ïa kane u Bah Prestone uba dei ruh u Symbud Myntri Rangbah ka Jylla u la pynpaw ha ka ka jingïalang pdiang burom ïa ki lai ngut ki MDC ka TMC kiba la shim ïa ka rai ban iehnoh ïa ka party kaba ki don bad pynïasoh noh sha ka NPP.
Kine ki lai ngut ki MDC na ka TMC kiba wan pynïasoh sha ka NPP ki kynthup ïa u Cherak Watre Momin MDC na Kharkutta constituency, u Alphonshus R Marak na Williamagar bad u Agassi R Marak na Balachanda constituency kynthup lang ïa u ophisar MCS ba la shongthait u Pius D Sangma uba dei u Director barim ka tnad Mineral Resources ka sorkar jylla.
Haba kren ha kane ka jingïalang, u Bah Prestone u la ong, ba da ka jingwan pynïasoh jong kine ki lai ngut sha ka party, ka jingkhlain jong ka party ka la nang kiew arted bad ïoh shuh shuh ka jingshaniah na ki paidbah ha ka jylla baro kawei.
Related Posts
U la kdew ruh ba dang ha ki khyndiat sngi ba la dep ki la dep pdiang burom ïa ki laingut ki MLA na ka UDP kiba wan ban pynïasoh sha ka NPP bad mynta pat ki la ïoh sa lai ngut ki MDC na ka TMC kiba wan pynïasoh.
“Ngi don ka jingkyrmen kaba skhem ba ha ka elekshon MDC ban wan ngin jop palat 19-20 ngut ki kyrtong bad ngin bteng ban thaw ïa ka Executive Committee,” u la ong.
Ha kajuh ka por u la ong ruh ba ka party ka la ïoh ban thaw history ha ka rilum Garo namar ym pat ju don satia ba kiwei ki party ki nud ban leh. “Ngi la thaw history bad phi dei ban tip ba ka jingmut jong ka District Council ka long ban ïada ïa ki trai muluk trai jaka. Kumta ban ym kulmar ka pateng ban sa wan na ka liang ka NPP ka pynbeit ïa kane,” u la ong da ka pynkynmaw ba ka jingpynbeit thymmai ïa ka thup nongthep vote kaba dei beit tang ïa ki riewlum ha ka elekshon MDC, ka kam ka lajan dep artad.
Shuh shuh u la ïathuh ba mynta ki la don ha ka kylla ba khatduh ban pyndep ïa ka jingphiah constituency thymmai bad ruh ïa ka thup nongthep vote kaba thymmai kaba ym pat don ki party kiba nud ban leh.
Shwa kane, u National President ka NPP u Conrad K Sangma u la ong ba da ka jingwan pynïasoh jong kine ki lai ngut ki MDC, ka jingbun paid jong ka party ha GHADC ka la kiew mynta sha ka 21 ngut.