Shillong, Nailur 25: Ka Meghalaya ka la pynkut noh ïa ka jingïalehkai jong ka ha ka lympung phutbol ‘Dr Talimeren Ao National Football Championship na ka bynta ka Junior Girls (Tier 2) 2026-27’ da ka nam rem kaba jur haduh 6-0 kol pyrshah ïa ka Sports Authority of India (SAI) ha ka semifinal ba nyngkong hynne ka step sngi Thohdieng ha Narainhpur, Chhattisgarh.
Ka kynhun ki thei ïalehkai ka Meghalaya ba la ïalam da ka Haphilabet Kharkongor kum ka coach, ki la pynliem ïa ka Jammu & Kashmir da 8-0 bad ïa ka Punjab da 2-1 ban pyndep ha khlieh duh jong ka Group jong ki bad ban rung sha ka semi phainal. Ka Meghalaya ka la don ha ka Group C kaba don saw tylli ki kynhun hynrei ka Nagaland ka la weng noh ïalade shuwa ban sdang ïa ka jingïakhun, kaba pynsah sa tang ar tylli ki kynhun ba ka jylla kan hap ban ïakhun pyrshah.
Ha kawei ka liang, ka SAI ka don ha ka Group A kaba don san tylli ki kynhun. Ka la jop ïa baroh saw tylli ki jingïalehkai group stage, da kaba pynliem ïa ka Chandigarh da 11-0, ïa ka Sikkim da 5-1, ïa ka Tripura da 6-0 bad ïa ka Uttarakhand da 5-2. Ka kynhun jong ka SAI ka kynthup shibun ïa ki nongïalehkai na Assam bad kiwei kiwei ki jylla ka thaiñ Shatei Lam Mihngi.
Na ka bynta ka jingïakhun hynne ka sngi, ka coach Haphi ka la wanrah lai tylli ki jingpynkylla ïa ka kynhun ba sdang jong ka Meghalaya, da kaba wanrah ïa ka Laiahunlang Nongrang, Bansara Rynshiang bad ïa ka Saphidabet Kharmalki ha jaka jong ka Ripaia Phawa, Bandabetshisha Nongrum bad ka Jenisha Rani.
Ha ka jingïakhun ka Yaiphabi Thokchom (43’) ka la pynlamkhmat ïa ka SAI tang hashwa ban jam sha ka por shongthait bad ki paralok jong ka ki la bynrap ïa kiwei pat ki kol ha ka kylla miet, ha kaba ka Sayani Chakraborty (57’, 70’, 72’) ka la thep hat-trick bad ka Anjaly Lhouvum (64’) ka la ïoh ban pynkhihjar tang hadien lai minit ba ka la mih bujli. Ka kol kaba khatduh jong kane ka jingïakhun la thep biang sa shi sien da ka Yaiphabi (84’).
Watla ka nam rem kan long kaba jwat ban pdiang, hynrei ka jingpoi sha ka semifinal ka dei ka jingjop ha lade bad ka kynhun Meghalaya baroh kawei ka lah ban sngew sarong ïa kaei kaba ki la lah ban pyndep ban kynjoh sha katei ka kyrdan.
Ki thei ïalehkai jong ka Meghalaya hynne ka sngi:
Dawansaphi Snaitang (GK), Paleimon L Lyngkhoi, Daficare Lyngkhoi, Nishalin Nongrum, Venecle Kharmusulman, Peacefully Pohplet, Vanessa P Mawthoh, Deiphiwansara Lyngkhoi, Laiahunlang Nongrang (sub Queenilia Kharkongor HT (sub Bandabetshisha Nongrum 73′), Bansara Rynshiang, Saphidabet Kharmalki
