Jowai, Nailur 20: Ka lympung lehkai phutbol bala tip kum ka (L) Kesilroy Pala Invitation Football Tournament 2023 bala pynïaid da ka West Jaiñtia District Sports Association (WJDSA) kaba la long hynne ka Sngi Balang ha madan Kiang Nangbah Stadium, Dongmihsngi Jowai.
Haba phai sha ka jingïakhun hapdeng ka CSA Dienchynrum United pyrshah ïa ka 7 Wasa FC, ka jingïalehkai ka la kut ha kaba ka Dienchynrum United ka la khur ïa ka namjop da 3-1 kol.
Ha kane ka jingïakhun, u Bantei Lyngdoh u la ïoh ban khyrwit haduh ar kol na bynta ka CSA Dienchynrum United haka minit ba 58 & 65 bad ka shi kol pat la thep da u Hanson Pdang haka minit ba 70. Na ka liang jong ka 7 Wasa FC ka la ïoh ban thep ïa ka shi kol na u Dashngain Sukhlain haka minit ba 81.
Lyngba kane ka namjop, ka CSA Dienchynrum United kala ïoh ban buh jaka ïalade ha ka Semi Final jong kane ka lympung.
Ka jingïakhun na bynta ka Quarter Final kaba ar kan long mynta ka sngi (21 tarik Nailur), ha kaba ka Rymbai Shkenshynriah FC kan aireng pyrshah ïa ka Mihmyntdu FC.
Ka jingïakhun ba lai lashai ka sngi (22 tarik) kan long hadpeng ka Mukhla FC pyrshah ïa ka Ialong FC.
Katba ka jingïakhun ba saw haka 23 tarik kan long hapdeng ka Mynsngat FC pyrshah ïa ka Salaroh FC baroh ki jingïakhun kin long haka por 2 baje nohphai sngi.
