Jop ka Tura DCA, la pynsangeh ïa ka jingïakhun kaba long ha Nongpoh

Shillong, Nailur 20: Ka kynhun lehkai jong ka Tura District Cricket Association ka la lah ban pynliem ïa ka South Garo Hills DCA da 16 ron ha ka jingïakhun kaba la shah pynthut ha u slap jong ka Meghalaya Cricket Association’s U-19 Boys Inter District Cricket Tournament kaba la long hynne ka Sngi Balang.
Ha kawei pat ka jingïakhun la hap ban pynsangeh, watla kata ruh ka Ri-Bhoi DCA ka la ïoh ban sdang ïa jingïalehkai da kaba seisoh pyrshah ïa ka East Jaintia Hills DCA.
Haba phai sha ka jingïalehkai na ka thup Zone 2 ha Salpara, ka Tura ka jop ïa ka toss , hynrei ka la ïoh ban kynjoh tang sha ka 107 ron shah pynhap da 9 wicket na ki 35.1 over.
U Salchang Sangma ryngkat bad u Silgar M Sangma baroh arngut ki la ïoh ban khur 3/22, katba u Ayush M Sangma 2/11, kaba la khanglad ïa ka TDCA ban kyntiew ïa ka ron jong ka. Baroh san ngut ki nongtied ba hakhmat jong ka Tura ki la shah pynhap khlem da kynjoh sha ka phew ron, katba ka kynhun ka la kamai 30/5.
Dei lyngba u Shahin Alone (21) bad u Darnell Sangma (11) ba ka ron jong ka kynhun ka la sdang ban kiew. Nangta ka 15 ron na u Agatchu Chetai K Marak ka la ïarap ban kyntiew ïa ka TDCA ban kynjoh sha ka 107 ron.
Ki nongkawangbol ba sdang jong ka Tura, kiba kynthup ïa u Denikcheng Marak (2/18) bad u Fernando Barbaryo M Sangma (2/12) ki la lah ban khanglad ïa ki player ka kynhun pyrshah (SGH) da kaba pynduna sha ka 42 na ki 5 wicket ha ka 13.3 over shuwa ba ka mariang kan pynlong ïa ka jingïalehkai ban jam sha kaba kut. Bad katkum ka DLS method, ka SGH ka la dei ban kynjoh sha ka 59 ha katei ka por, dei lyngba kane ba ka Tura ka la ïohei ban khur ïa ka namjop da 16 ron.
Katba ha ka jingïalehkai jong ka Zone 1 na ka Group A kaba la long ha Umbuda, Nongpoh, ka Ri-Bhoi hadien ba jop ïa ka toss ka jied ban tied nyngkong. Bad ka la kamai 6.57 ron man ka over, ki la ïoh ban kynjoh sha ka 184 ron bad hap 8 wicket na ki 28 over. Hynrei ka jingjur jong u slap ym shym la ïoh ban bteng ïa kane ka jingïalehkai.
Lajan baroh ki player tied ka Ri-Bhoi ki la ïoh ban kamai ron na bynta ka kynhun. U Banialam Mylliemngap u la kamai bun ron duh da 34 ron khlem shah pynhap (not out) tang na ki 18 bol (4x4s, 2x6s).
U Dev Rai (3/29) ryngkat bad u Jeffre Chyrmang (3/34) ki dei napdeng ki rangkawangbol ba seisoh na bynta ka East Jaintia Hills DCA.
Ka jingïalehkai mynta ka sngi, na ka Group B, ka East Khasi Hills Cricket Association kan sa hap ban aireng pyrshah ïa ka West Jaintia Hills DCA. na ka Zone 2, ka North Garo Hills DCA kan ïakhun pyrshah ïa ka Tura.