Nongpoh, Kyllalyngkot 25: Kum shi bynta ban pynshlur ïa ki paidbah kiba la kot 18 snem shaneng ban sngewthuh ïa ka dor jong ka jingjied ïa ki nongmihkhmat, ka Patharkhmah Civil Sub Division mynta ka sngi ka la rakhe ïa ka National Voter’s Da da kaba ïaid kjait paidbah (Walkathon) na ïew Jirang sha Government Higher Secondary School, Patharkhmah.
Ki samla na ka thaiñ Patharkhmah ki la wan ban shim bynta ha kane ka jingrakhe ïa kane ka National Voter’s Day da kaba ïaid kjat naduh na ïew Jirang shaduh sha government Higher Secondary School, Patharkhmah, ha kaba u Sub Divisional Officer ka Patharkhmah Civil Sub Division, u Bah M.B Tongper ruh u la shim bynta lang kum u kongsan.
Kum ban pynpaw paidbah, ka ophis u Sub Divisional Officer ka Patharkhmah Civil Sub Division ka la pynlong ïa kane ka jingïaid kjat ka long shi bynta ban pynsngewthuh ïa ki paidbah ba kin tip ïa ka hok jied nongmihkhmat bad lyngba kane ka National Voter’s Day la pynsgnewthuh ruh sha ki samla bad ki paidbah ba ki dei ban mih shakhmat ban pynrung kyrteng ïa lade na ka bynta ban ioh jied ïa ki nongmihkhmat paidbah.
Kumba la ïathuh da u Sub Divisional Officer ka Patharkhmah Civil Sub Division, la ong ba ha kane ka sngi ba la rakhe ïa ka National Voter’s day la sam ruh ïa ki EPIC sha kito ki samla kiba la iohi ban thep vote bad kiba la pynrung kyrteng ïa lade hadien ba ki la kynjoh sha ka rta kaba 18 snem kumba la buh da ka sorkar ba kin ioh ïa kata ka hok ban thep vote.
Shuh shuh, u la ïathuh ruh la sam ruh ïa ki khusnam sha kito ki samla kiba la shim bynta ha kane ka jingïaid kjat (Walkathon) kaba long shi bynta ban pynshlur ïa ki ba kin sngewthuh ïa ka dor jogn ka hok ban thep vote kumba la pynkup bor da ka riti synshar ka ri India.
