Bthah u DEO EJHD ïa ki BLO ban pynpoi ïa ka Form 12D sha ki briew kiba dei ban ïoh

Khliehriat, K’lyngkot 25: U District Election Officer, East Jaiñtia Hills District, ha ka jingpyllait khubor mynta ka sngi, la ong ba u la dep bthah ïa baroh ki Booth Level Officer (BLO) kiba don hapoh ka district ba ki dei ban shim khia ban pynpoi ïa ka form 12D sha kito ki briew kiba kynthup ïa kito kiba don jingduna haduh 40 percent shaneng ha ki dkhot met bad sha kito ki tymmen kiba la don 80 snem shaneng bad sha kito kiba suba ba ki don ïa u khñiang jingpang covid-19, kiba dei ban ïoh ïa kine ki form na ka bynta ba kin ïoh ban thep vote lyngba ka Postal Ballot.
Katkum ka jingbthah kaba dei na ka bynta ban sam ïa ki form 12D, la bthah ba ki Booth Level Officer (BLOs) ki dei ban leit rung ha kito ki longiïng kiba don ha ka thup AVSC/ AVPD bad AVCO, kaba long katkum ki jingtip ba la ïoh na u Returning Officer (RO) ha ki polling station bad ban ai ïa ki form 12D sha kito kiba dei ban ïoh bad ha kajuh ka por ki BLO ki hap ban ai ïa ki kaiphot kum ka jingpyntip sha ki RO bad lada kim lap ne shem ïa kita ki nongthep vote, ki BLO ki hap ban ai jingtip sha u RO bad ki hap ban leit wad biang ïa kita ki briew hapoh ka san sngi bad pynshai ba kito ki briew ki lah ne kim lah ban leh da kine ki postal ballot bad lada ki lap ïa kita ki briew ba ki don ha la ki ïing, ki BLOs ki hap ban pyndap ïa ka form 12D na ïing jong ki hi bad phah sha u RO hapoh ka san sngi.
La bthah ruh ba u Sector Officer ba un peit bad bishar ïa ka jingsam bad jinglum ïa ki Form 12D da ki BLOs kaba hapoh ka jingpeit jong u RO, ïa ka thup kyrteng jong kito kiba don jingduna ha ki dkhot met (PWD) bad kito ki tymmen kiba la don 80 snem kyrta shaneng lah ban ioh na ki nongtrei kiba dei bad ka khanasamari (Enumerator).