Wat pyntieng da ki buit jakhlia jongphi, sngewbha tyngkai ïa ki buit jakhlia jongphi ha ïing

Shillong, Naiwieng 06: Kawei na ki dkhot jong ka Joint Action Committee pyrshah ïa ka Shillong Ropeway Project ka la ther kylla ia u Myntri ka sorkar jylla u bba khmih ïa ka kam Jngohkai Pyrthei u Bah Paul Lyngdoh da kaba ong, “Wat pyntieng da ki buit jakhlia jong phi ïa ngi sngewbha tyngkai ïa ki buit jakhlia jong phi ha la ïing.” Kane ka jingïakhih ka JAC ka la kylla long ka jingïatyngkhuh ba khlem ka ïa pyndem naba ka sorkar ka ong ba kam lah ban pyndam ne pynkynriah ïa ka projek katba ki nongïakhih ki ïeng skhem ba kin nym ailad ban pyntrei ïa kane ka project ha u Lum Shyllong.
Ka Joint Action Committee (JAC)! Against the Shillong Ropeway Project ka la pynlong ïa ka jingïakhih da kaba shong kyllaiñ myngor ha khmat u mot jong u Kiang Nangbah ha ka sngi Thohdieng, shisngi hadien ba ka Sorkar ka la pynpaw shai ba ka jingïateh soskular aiwai jaka kaba la soi saw snem mynshwa, ka pynlong ïa ka projek ban neh ha ka jaka kaba la ithuh, bad ba projek ka dei kaba jngai 3.15 kilomitar na ki tyllong um.
Halor kane, na ka liang ka dkhot ka JAC, ka Kong Venisha Mawlong, ka la pynshai ba kane ka jingïakhih shong kyllaiñ mungor kam dei ka jingsdang thymmai jong ka jingïakhih, hynrei ka dei ka jingpynkynmaw ïa ki paidbah ba kane ka jingïakhih ka la ïaid naduh kaba nyngkong eh.
Ka la ong, “Ma ngi kum ka JAC ngi la ïamih sha surok, bad kane kam dei ka jingsdang jong ka jingïakhih, hynrei ka long ban pyni sha ki paidbah ba ka JAC kam shym la shongthait naduh kaba nyngkong eh.”
Da kaba kynthoh ïa u Myntri ka tnat Jngohkai u Bah Paul Lyngdoh, ka Kong Venetia ka la ong ba ka jingkren jong u ba ym donkam ban ïam ka pynpaw ïa ka jingbym sngewthuh ïa kaei kaba ki kmie jong ka katei ka thaiñ ki ïakynduh, bad ka la long kum ka jingthombor shimet ïa ki.
Ka la ong, “Nga kwah ban kren shai khamtam eh ïa u Myntri ka tnat Jngohkai Pyrthei, Bah Paul Lyngdoh, uba dei u 12 bor, kumno u lah ban ong ba ym donkam ban ïam ne jaw ummat? Hato u sngewthuh ïa kaei kaba ngi ki kmie ngi mad marwei marwei? Kam dei ban don kano kano ka jingkynthoh shimet pyrshah ïa ngi.”
Ka la pynkynmaw ïa ka mynnor jong u Bah Paul Lyngdoh kum u president ka KSU, bad ong ba ha kitei ki por ki paidbah ki shaniah ïa u Bah Paul ban lum lang ïa ki khun Khasi bad kylli kylla mynta, balei ba uta u juh u nongïalam mynta u ïeng pyrshah ïa ki, kiba ïakhun ïa ka bha ka miat lang jong baroh.
Ka la ther da kaba ong, “Balei mynta u pyrshah ïa ngi, u byrngem ïa ngi lyngba kita ki buit jakhlia jong u, sngewbha wat byrngem ïa ngi ki paidbah, wat pyntieng da ki buit jakhlia jong phi, sngewbha buh bad tyngkai ïa ki buit jakhlia jong phi ha ïing jong phi.”
Wat la u Bah Paul u don shabar ri, hynrei ka Kong Venetia kala ong ba ka khubor ka dei ban poi sha u bad ka JAC kam shongthait.
Haba kylli, hato ka JAC kan phai khmat shaka Meghalaya High Court, ka Kong Venetia ka la ong ba ka JAC kan nym ujor sha ka High Court na ka bynta ban tuklar halor kane hynrei yn sa ïaleh hi katba lah.
Halor ki tyllong um, ka Kong Venetia ka la ong ba ka pynsngewsih ïa ka ban ïohi ïa u briew uba la ieid ïa ka shnong ka thaw, mynta, ha ki kyntien jong ka, u pyndonkam ïa ka shuki ban byrngem kylla ïa ki paidbah nong shong shnong.
Ka la kynthoh, “Lada u Bah Paul um don ha ka shuki mynta, un jin da don ryngkat bad ngi mynta namar ba u dei u briew uba ieid ïa la ka shnong ka thaw ha kawei ka por hynrei mynta u don ha ka kyrdan, u don ha ka shuki, ka shuki mynta lehse ka la nang khlaiñ shuh shuh kumta u byrngem, ym tang ïa ngi ki paidbah ka Raid Laban hynrei u la byrngem ïa ka Jylla baroh kawei.”
Katba u chairman ka Greentech Foundation u Bah H Bansiewdor Nonglang haba ai jingkren ha kane ka jingïalang u la ong ba ka jingïakhih hadien 4-5 bnai halor kane ka mat ka long ban ïathuh paidbah ïa ki jingshisha kiba ka sorkar kam shym la ïathuh.
U la ong, “Ngi kwah ban pyntip sha ki paidbah ba kin tip ruh ïa ki jingshisha, haduh mynta ka Sorkar kam pat ïathuh ïa phi ïa ki jingshisha.”
Shuh shuh ula ong ba ka jingïatai paidbah ka la pynleit jingmut ha ki 544 tylli ki dieng kiba la pom. Hynrei ki kot ki sla, u la kam, ki pyni ïa kaei kaban mih ha ki Terminal.
U la kylli, “Hato phi tip, ha ki artylli ki terminal kiei ki jait jingtei kin mih, hato phi tip kin wan ki Restaurant, ki Food court, ym dei ba kren tang da ka kyntien, hangne ha ka jingthoh ka don baroh.”
U Bah Nonglang ula ong ba kane kan plie lad ban pynlong jaka shimet bad ka jingpynlong jaka khaïi pateng ïa u Lum Shyllong.
“Lada ngi duh noh mynta, wat kren shuh shaphang u Lum Shyllong nangne shakhmat,” u la pynpaw.
U bah Nonglang u la ong ba ka GTF ka la ïatreilang bad ka JAC hadien ba ka la bishar bniah ïa ka jingud jingnam ki dkhot ka JAC wat hapdeng ka jingshah kynthoh ha ka sorkar ha kiba bun ki liang ba kynthup ia u Lumpongdeng bad kiwei kiba la shimkhia da ka Green Tech ban ïada na ka jingshah pynjot ka mariang bad ki um ki wah.