Shano jah u MLA wat haba ki nongshong shnong ki la ïakhih la slem ban pyrshah Ropeway: JAC
"Ngi dei ki nongshong shnong ka 19th South Shillong"
Shillong, Naiwieng 06: Ki dkhot jong ka Joint Action Committee Against Shyllong Peak Ropeway Project ha ryngkat ki nongshong shnong jong ka riat Laban Dorbar Pyllun ha ka jaka ba ki la pynlong ka jingïakhih ki la buh ka jingkylli ïa la u jong u MLA uba long mynta kum u Myntri Sorkar u Bah Sanbor Shullai uba la jah khlem ïohi naduh ka por ba ka JAC ka la pynlong ka jingïakhih ïa kane ka project.
Haba kren sha ki lad pathai khubor ka President jong ka JAC ka kong Debora Marbaniang ka la pynpaw ka jingsngew lynngoh ba haduh kine ki sngi u MLA jong ka 19th South Shillong Constituency u la jah bad khlem da wan khmih, wan peit bad wan jngoh ba ki nongthep vote jong u ki mad bad ïakhih na ka bynta ka bha ka miat lang jong baroh.
“Kaba sngewlyngngoh ba u MLA jong ngi u Bah Sanbor Shullai naduh ba sdang haduh mynta u khlem wan mih u khlem wan jngoh bad haduh mynta ruh ba ngi shong hangne ha u Mot Kiang Nangbah ban ïakhih bad rah placard u khlem wan ban kylli ne ban wan jngoh ban khmih ïa la ki jong ki nongshong shnong ka Constituency,” ong ka President ka JAC.
Katba kawei pat ka dkhot jong ka JAC ka la ïathuh ba baroh kiba shong ïakhih lang ha kane ka jaka ki dei kiba ju thep vote bad kyrshan ïa u naduh ki por ba u dang ïakhun ïa ka elekshon MDC bad mynta ba u la long u Myntri Sorkar u la klet noh ïa la ki jong ki nongkyrshan bad ki nongshong shnong.
“Ngi kyrpad ïa u Bah Sanbor ban wan ban khmih ym dei ban pyrkhat tangba la biang ïalade bym donkam shuh ïa ki nongshong shnong, ngi ruh ngi dei hok ban ïoh ïakren ïa la u jong u nongïalam jong ka shnong baroh kawei bad ka JAC kumba ka la ong kan bteng ban shong beit ha kane ka jaka baroh shimiet, ban aiti ïa la ka jong ka jingim haduh ba ka sorkar kan weng ïa kane ka project,” ong ka dkhot ka JAC.
Ki la kyrpad ïa ki rangbah shnong ba kin wengnoh, pynphai noh ïa ka jingai wai kumba 30 snem bad hadien kane ka snem kan shu kam ei ka sorkar bad ki khun jong ki pateng ban wan kin ym tip shuh ïa kata ka jingai wai da kaba shu ïamynjur.