‘Pyndam ïa ka Project bad rah shawei’ : Ngin lynñiar, ngin ïam haduh ban da rung sha ki thied ki jaw, ki shyieng ki shruh jong ka Sorkar byrngem ka JAC
Shillong, Naiwieng 06: Ka Joint Action Committee kaba pyrshah ïa ka jingshna ïa ka Ropeway ha u Lum Shyllong ne ka JAC Against Shillong Peak Ropeway Project ha ka sngi Thohdieng ka la pynlong ïa ka jingïakhih bad rah ruh da ki placard bapher bapher kiba thoh pyrshah ïa ka jingshna ka Sorkar Jylla lyngba ka Tnat Jngohkai Pyrthei ïa ka Ropeway ha u Lum Shyllong.
Lyngba ki jingpyrta bad jingthoh pyrshah Ropeway ki nongïalam ka JAC ba kynthup ïa ka President ka Kong Deborah Marbaniang, ka Kong Vinisha Mawlong, ka Kong I Mawlong bad ba kynthup ruh ïa u Chairman ka Green Tech Foundation u Bah HB Nonglang ki la ïeng skhem ban ong beit em ïa ka Ropeway ban shna ha u Lum Shyllong bad ba dei ban rah sha ki jaka ba donkam hok shisha.
Napdeng ki longkmie kiba dei ki dkhot ki la ong ba kin lynñiar bad ïam beit khlem sangeh haduh ban da rung sha ki thied ki jaw, ki shyieng jong kiba don hapoh ka Sorkar.
Kine ki longkmie ki la ong ba kin ïakhih beit bad aiti ïala ka jingim haduh ban da pyndam ïa ka project.
Na ka liang u Chairman ka Green Tech Foundation u Bah Nonglang u la jubab ruh ïa ki jingshah kynthoh halor u Lumpongdeng ha u Myntri Jngohkai Pyrthei u Bah Paul Lyngdoh bad ki daw ba la kyrshan ïa ka JAC halor ka project kaba la wanlam sha ka jingshah pynngat ki palat 450 tylli ki dieng.
Ki nongïalam ka JAC ki la kren ruh da kaba shai ba ka jingïakhih jong ki kadei beit ba ki sngewkhia ban pynjulor ïa ka mariang ba jyrngam u Lum Shyllong, ka jingpomdieng, ka jingma ki tyllong um, ym dei ïa ka ropeway, hynrei dei ban rah shawei sha ki shnong ba donkam, bad ong ruh ba ka jingïakhih kam don jingïadei bad kano kano ka party seng saiñ pyrthei kumba la shah kynthoh ha Social Media bad kob ruh ïa kito kiba kynthoh ban wan markhmat ym ban long ksan rympei rem dorbar.
Hadien kane ka jingiakhih da kaba shong hapoh u Mot Wah Kiang Nangbah kaba don hajan pyrshah ka Civil Hospital kaba ha Barik Shillong, na ka liang ki dkhot jong ka JAC ki la pynlong ruh ki jingduwai ban pynjur ia ki jingkyrpad jong ki ia ka sorkar ba ka dei ban pyndam noh ia kane ka projek ropeway.