La don ka jingtyrwa ban shna Ropeway na Mawsynram sha Sohra, hynrei la shu jah noh, pynim biang ïa ka: Titos

“Wat ïalap bymlah pynkynriah, ka kompani ka dei ban ïohshwa ka laisen”

Shillong, Naiwieng 06: U MDC ka United Democratic Party na Sohra u Bah Titosstarwell Chyne haba ong ba lada ka sorkar ka mon ka lah ban pynkynriah ïa ka Shillong Ropeway Project sha kiwei pat ki jaka lada ki paidbah kim kwah ban don ha ka thaiñ Laban.
Halor kane haba kren sha ki lad pathai khubor u la pynkynmaw ba ha ka por jong ka sorkar u Dr. Mukul Sangma ha u snem 2015 ka la don ka jingtyrwa ban shna ïa ka Ropeway na Mawsynram shaduh Sohra, hynrei kane mynta ka la shu jah noh bad na ka liang jong u, u la kyntu ïa ka sorkar ba ka dei ban pynim biang ïa kane ka project.
“Ha u snem 2015 ka la don ka jingtyrwa ban shna Ropeway na Mawsynram sha Sohra bad ka la don ruh hapoh ka jingmang tyngka jong ka sorkar bad ïa kane ka mat la dep ruh ban ïakren hapoh ka ïingdorbar thaw aiñ jong ka jylla, hynrei kane mynta ngam tip balei bad ha kano ka rukom ka la shu jah noh,” ong u Bah Chyne haba kylli halor ka jingsngew jong u halor ka jingïakhih ki nongshong shnong ka Laban bad kumjuh ruh ki nongïalam jong ka Joint Action Committee ba pyrshah ïa ka Lum Shyllong Ropeway Project.
U Bah Chyne u la ong ba ha ki por ba mynshwa ki la don teng ki projek kiba heh kiba la hap ban pynkynriah noh sha kiwei pat ki jaka hadien ba la mih ki jingpyrshah jong ki nongshong shnong bad kiwei pat kidaw, la ka long ha ki jaka puta ne kiwei pat ki jingbym mynjur.
“Mynshwa ki la don ki projek kiba heh kiba ka sorkar ka thmu ban shna ne wanrah, hynrei namar ba mih ki jingïakhih bad ka jingbym pdiang ki nongshong shnong ka sorkar ka la hap ban pynkynriah ne ban rah noh sha kiwei pat ki jaka, na ka bynta ka bha ka miat jong ki nongshong shnong ka jylla, kumta ka sorkar kam dei ban ïalap ba ym lah ban pynkynriah ïa kane ka projek,” u la ïathuh da kaba bynrap ba kumjuh ruh ïa kane ka Ropeway project kaba ha u Lum Shyllong lada ka la lap ba don ka jingktah ïa ki nongshong shnong, ka mariang bad kiwei ki jingpynpaw ka sorkar ka dei ban pyrkhat.
Ha kawei pat ka liang u Bah Titossatarwell Chyne u la ïai ban biang ba ki jaka kiba hap hapoh ka khyrnit kaba 6 ka District Council ka lah ban pyntreikam ïa ki aiñ jong ka lada ki briew shimet ne ki company ki thmu ban pyntrei ïa ki kam ne leh ki kam khaïi la kadei kaba dang sdang ne kiwei pat, donkam ban ïoh ïa ki laisen khaïi na ka KHADC.
“Hynrei kane nga ieh ha ka jingstad jong ka EC kaba mynta kumno ka la leit khang ïa ka ophis jong ka company ba pyntrei ïa ka Ropeway Project bad ha kano ka nongrim jong ka aiñ ba ka la shim hynrei lada ki dei ki jaka kiba hab hapoh ka jingpeit jingkhmih ka KHADC, ka Council ka don ïa ka bynta jong ka,” ong u MDC ka Sohra, da kaba bynrap ba ka Company ka dei ban ïoh shwa nyngkong ïa ka laisen khaïi na ka KHADC.