Khliehriat nailar 21: Ka Hynñiewtrep Achik National Movement Narpuh Circle, mynta ka sngi ka la leit ban buh da ka jingthoh hakhmat u Secretary jong ka Meghalaya State Pollution Control Board ha kaba ka seng ka la pynpaw ïa ka jingpyrshah halor ka jingthmu ban pynlong ïa ka public hearing jong ka Meghalaya Cement Ltd kaba la thmu ban pynlong ha ka 24 tarik mynta u bnai ha shnong Thangskai.
Katkum ka shithi ba la soi da u President jong ka HANM Narpuh Circle, u bah P.Syiemlieh bad u General Secretary, u bah S.Sumer, ka seng ka la ong ba lada ailad ïa katei ka company bad pynlong ïa kane ka public hearing kaba long halor ka jingthmu ban pynheh ïa ka plant ( Extension plant ) lane ban kyntiew ïa ka jingpynmih Clinker kaba na ka 2600 TPD (0.858) sha ka 4500 TPD (1.485) ryngkat bad ka 10 MW Captive Power Plant 9.5 MW waste Heat Recovery System (WHRS), kane kan ktah ïa ka mariang, kan pynjakhlia ïa ka lyer bad ktah ïa ka koit ka khiah jong ki paidbah ka thaiñ, ym tang katta, kan ktah ruh ïa ki um bam, um dih haduh ba kin nym long shuh ban bam ban dih bad kan ktah ïa ka thung ka tep ha ka rep ka riang.
La ong ruh ba ka seng ka la ioh ruh ki jingujor na ki paidbah jong ka thaiñ Wahiajer, kiba la wanrah ïa ka shithi jingujor ha ophis treikam jong ka seng kiba la pynpaw ka jingpyrshah ïa kane ka public hearing.
Kumjuh ruh na ka liang ka seng ka ong ba kane ka jingthmu jong ka tei ka Company kan ktah bha ïa katei ka shnong namar ka don tang kumba 500 meter eiei ka jingjngai na shnong Wahiajer bad kan ktah ruh ïa shnong ba marjan “ Ka jing don jong kine ki karkhana dewbilat hapoh ka thaiñ kam don jingmyntoi eiei, hynrei tang ki jingjot suda” ong u President ka seng Bah P Syiemlieh da kaba bynrap ruh ba “mynshwa ka thaiñ Narpuh ka don ki um ki wah kiba sngur bha bad ka lyer kaba khuid bad ki khlaw ki btab ruh ki long kiba rben bad ba jyrngam bha, hynrei naduh ba wan kine ki company dewbilat ha ka thaiñ kala kylla long la kum ka jaka theh ñiut ha kaba ki um, ki wah, ka lyer kim long shuh kiba biang ne ba kiba khuid, wat ki jingthung, jingtep bad ka rep ka riang ruh kam long shuh bad ki khlaw kila syllen lut bad kane ka la wanrah ka jingduh nong ïa ka thaiñ, sa katno shuhshuh ka sorkar kan dang ai lad ïa ki tei ki karkhana dewbilat, hato kam pyrkhat shuh ïa ka lawei hadien habud? Kumta dei halor kane ka nongrim ba ka seng ka ieng skhem ban pyrshah jur ïa ka tei ka public hearing”
