Nongpoh, Nailar 21: Ban nang ai mynsiem ïa ki khynnah pule khamtam ba kin nang lah ban minot bad ban treishitom ba kin kot pat sha ka thong ha ka jingim jong ki, ka Seng Samla Nongpoh, ka la pynlong ïa ka prokram ban pynkup burom ïa palat 31 ngut ki khynnah pule kiba la pass bha ha ka eksam SSLC bad HSSLC bad degree jong u snem 2022-2023 ha kaba ïa kane ka prokram pynkup burom la pynlong ha Sngi Saitjaiñ ha ïingdorbar ka Shnong Nongpoh.
U Bah Mayral Born Syiem, MLA ka Nongpoh Konstituensi u la wna ruh ban shim bynta kum u kongsan ban pynkup burom ïa kine ki samla pule bad la sakhi lang da ka jigndon lang u Bah Sylvester Mynsong, Rangbah Shnong ka Nongpoh, u Bah Gordon Tham, dkhot ka Apex Council jong ka Synjuk ki Seng Samla Shnong, ki nongkitkam ka Seng Samla Nongpoh ba kynthup ïa u samla Lumlang Shylla kum u president, u samla Ronald Rani, General Secretary nalor kiwei kiwei.
Ha kane ka sngi na ka liang ka Seng Samla Nongpoh ka la sam ruh ïa ki khusnam sha kitei ki samla pule ryngkat ki syrnot ban pynsah jingkynmaw halor kane ka bynta ba kum ka seng Samla ka la pynkup burom shi bynta ban ai mynsiem bad ban pynshlur ïa ki samla ba kin don ïa kata ka mynsiem ban dang trei shitom ha ki jingpule bapher bapher jong ki.
Haba kren kum u kongsan, u Mayral Born Syiem, kum u nongmihkhmat paidbah, u la pynpaw ïa ka jingkmen kaba khraw bad ruh ïa ka jingïaroh ïa ki nongkitkam ka Seng Samla Nongpoh kiba la shimkhia ban pynkup burom ïa ki khun samla ka Shnong Nongpoh kiba la lah ban pass bha ha ka eksam SSLC bad HSSLC kum ka dak ban ai mynsiem shuh shuh ïa ki samla pule.
U la ai ruh ïa ki kyntien kyntu kynpham, sha ki khynnah pule ba kin kiar na ki jingdih ba sniew kiba har rukom, ban kiar na ki jingsniew jong ki mobile bad teknoloji bapher bapher bad ruh ban trei minot ha la ka jingpule khnang ba kin ioh kheit ïa u soh bathiang ha ka jingim ka jong ki da kaba ki longbriew manbriew ha ka lawei ka jong ki.
