Kyntait u bah Hek ïa ka jingkren u President MPCC halor ba pynïasoh BJP ki 8 ngut ki MLA UDP
Yn bteng buddien halor ka kam tih dewïong
Shillong, Risaw 04: U MLA ka Pynthorumkhrah bad u nongïalam rangbah ka BJP, Bah AL Hek, u la ong ba ki phra ngut ki MLA barim ka UDP kiba la pynïasoh bad ka BJP kin ym mad ïa kajuh ka jingjia kumba la mad da ki MLA ka Congress kiba la leit sha ka TMC ha ki snem ba la dep.
U Bah Hek u la ong ruh ba ka BJP ka don ïa ka nongrim kaba khlaiñ ha Meghalaya bad ka jingrung jong ki MLA bad MDC sha ka BJP ka pyni ïa ka jingkhlaiñ jong ka party.
Haba pynphai nia halor ka jingkren jong u President ka MPCC, Bah Vincent H Pala, u Bah Hek u la ong, “Ym lah ban peit ïa baroh ki jingkylla saiñ pyrthei da kajuh ka rukom. Ka BJP ka don la ka jong ka nongrim kaba khlaiñ. Phi la iohi dang ahen ba bun ki MLA bad MDC kiba dang don ha ka kam ki la wan ban pynïasoh bad ka BJP.”
U la ong ruh ba kito kiba la pynïasoh bad ka BJP ki skhem ha ka rai jong ki bad kin treikam ban pynkhlaiñ ïa ka party, khnang ba ka BJP kan lah ban ialam ïa ka sorkar ha ka elekshon jong u snem 2028.
Haba kylli halor ka jingkren ba ka BJP ka dawa ïa ki shuki Myntri bad ïa ka shuki Speaker hadien ba ka jingdon ki MLA ka BJP ka la poi sha ka 10 ngut, u Bah Hek u la ong ba um don jingmut ban shim ïa ka shuki Myntri.
“Ngam don satia ka jingthmu ban shim ïa kano kano ka shuki Myntri. La kan don ne em ka jingkylla ha ka sorkar, kata ka dei ka rai jong u Myntri Rangbah. Kane ka dei ka sorkar MDA,” u la ong.
U Bah Hek u la ong ruh ba watla don kiba kwah ba un long u Symbud Myntri Rangbah, hynrei um kwah ïa kata ka shuki.
“Kiba dang wan sha ka party ki dei ban ïoh ïa ka lad ban shakri. To ai ba kin long Myntri. Nga ngan pynleit jingmut na bynta ka ilekshon 2028,” u la ong.
Haba kren halor ka jingkhang tih dewïong ha Meghalaya, u Bah Hek u la ong ba ka BJP ka dang buddien ïa kane ka mat ha ka sorkar pdeng.
U la ong, “Ngi dang buddien ïa ka bad ngi la kyrpad ïa ki nongïalam ka party ha Delhi, kynthup ïa u Myntri Rangbahduh Narendra Modi bad u Amit Shah, ba dei ban weng noh ïa ka jingkhang tih dewïong ha Meghalaya.”