Haduh tyngkong ïing yn leit ki BLO ban pynthikna ba uwei ruh u nongthep vote un nym shah iehnoh

Nongpoh, Risaw 03: Namar ba ki dang don ki nongthep vote ki bym pat pyndep ïaki kot ki sla, ka Election Commission of India kala pynjlan haduh 26 tarik Risaw ban pynmih ïaka thup ba khatduh ki nongthep vote, bad ban pynthikna ba uwei ruh u nongthep vote um dei ban shah weng ne shah ieh, naka liang ki BLOs kin sa leit haduh ki tyngkong iing jong kito ki briew ki bym pat pyndep ïaka jingpynrung kyrteng bad ruh ki kot ki sla ba donkam naka bynta ka jingïaid beit jong ka SIR.
Naka liang u Deputy Commissioner (EL) u la pyntip ba kito ki nongthep vote ki bym pat pyndep ïaki kot ki sla kim donkam ban leit sha ki ophis jong ki ERO ne AERO naka bynta ka jingshah khot, hynrei kin leit haduh tyngkong iing lait noh tang ki katto katne bala rai da ki ERO ba ki hap ban leh ïaka online hearing bad kito ki nongthep vote ki lah ban phah ïano ïano kiba la kham rangbah ban leh ïa kane.
Katkum ka jingbthah jong ka ECI la buh ruh ïaki lad jingïarap bad ruh ki jaka ba kyrpang ban ïarap ïa kito ki briew ki bym don iing, ki nongtrei bylla bad kiwei khnang ba ka SIR kan ïaid beit shakhmat bad shaphrang ha kaba baroh ki DEOs, EROs, AEROs bad BLOs kin pynthikna ba ki nongthep vote kin pyndep ïa kane haka por ba biang.
Kumba long ha Ri-Bhoi district haduh ka 1 tarik Risaw ka jingïaid shaphrang jong ka SIR ka long ba napdeng 1,90,066 ngut ki nongthep vote kiba la rung kyrteng haka Draft Electoral Roll, kumba 81,397 kila shah phah shithi, bad ym don mano mano ruh ki ban shah kyntait, katba 1,66,139 ngut ki dei kiba la thikna haka thup katduh ka Electoral Roll.
Shuh shuh la kyrpad ruh ïa kito ki nongthep vote kiba la shah ai kot ne shithi ba kin ai ka jingïatreilang bad ki BLOs ban ai ïaki kot ki sla ba donkam bad la bthah ruh ïa baroh ba kin pynthikna ïaki kyrteng jong ki hadien bala pynmih ïaka thup ba khatduh ki kyrteng jong ki nongthep vote baroh.