Mih ka jingbyrngem na ka JCMDA ban tur sha Secretariat lada ka sorkar kam leh eiei ïa ka kam dewïong

Khliehriat jylliew 04: Ki nongialam jong ka Jaiñtia Coal Minner and Dealer Association (JCMDA) haba kren sha ki pathai kubor ki la iathuh ba mynta ka sngi ruh ka 4 tarik u jylliew ki la pynlong biang ïa kawei ka jingialang ha Moowakhu ha shnong Dkhiah West ha kaba ka Association ka la iakren shibun kiei kiei kiba ïadei bad ka kam dewiong, ka Association ka ai khublei ïa ki paidbah kumjuh ruh ia ki sengbhalang bad ki seng bapher bapher kiba ai ka jingkyrshan ïa ka Association.
Haba kren sha ki pathai khubor ka la mih ruh ka sur ba ka Jaiñtia Coal Minner and Dealer Association (JCMDA) kan tur beit sha Secreteriat Shillong, lada ka sorkar kam leh eiei hapoh ka lai bnai kumba la dep ai por da ka Association.
Uwei na ki dkhot jong ka JCMDA, u bah Sambormi Lyngdoh uba dei ruh u President jong ka Jaiñtia National Council u la ong “Kawei ka khubor kaba ngi kwah ban phah sha ka sorkar khamtam sha u myntri rangbah ka jylla, u Conrad Sangma ka long ba dei ban leh eiei hapoh kane ka lai bnai ioh ba ka ding kan klang, namar hadien kane ka lai bnai ngi na ka liang ka JCMDA ruh ngim lah shuh ban tehlakam ïa ki paidbah, te ngi tieng ba ha ka jingthngan, jingsliang, jingbitar ioh ba ki paidbah kin shim ïa ka aiñ ha kti te lada kane ka sorkar ka ieid ïa ka shongsuk, shongsaiñ hapoh ka jylla ka dei ban leh eiei hapoh kane ka lai bnai namar mynta ka dang sah sa shi bnai, lym kumta ka sorkar ka dei ban long kaba la khreh ban mad ïa ki jingiakhih kiba tyngeh, ngin nym iakhih shuh hapoh Jowai ne ha Khliehriat hynrei ngin wan beit ban tur puk sha Secreteriat.”
Shuh shuh u bah Sambormi Lyngdoh u la ong “Mynta ka sngi ka 4 tarik u jylliew, ngi na ka JNC bad kiwei kiwei ki sengbhalang ngi la ioh ban ïa shong jingialang ryngkat bad ka Jaiñtia Coal Minners and Dealers Association bad ha kane ka jingialang ka la mih tang kawei ka sur ba ngi dei ban iatylli bad iashohkti lang kawei hapoh ka jingialam ka JCMDA kaba dei ka seng kaba la rim ha ri lum Jaiñtia kaba la mih shalhmat naduh kito ki por ba ka NGT ka khang ban tih dewïong, te ngi kum ki sengbhalang ngi phah ïa ka khubor kaba shai sha ka sorkar ba kam dei ban shu ialehkai bad ka ja kpoh jong ki paidbah, kam dei ban pynlong politik ïa kane ka mat namar la bunsien ngi la lap ïa ka jingkular jong kane ka sorkar kaba la ialam da ka party NPP ha kaba ki la ju kular ba kin plie ia u dewïong hadien hynriew bnai, khyndai bnai hynrei ngi iohi ba kane baroh ka sah tang ha ka jingkren, hooid ngim lah ruh khlem da ai khublei ïa ka sorkar namar ngi iohi hi ïa ki dak ki shin ba ka sorkar ka la trei, hynrei ka jingwanrah ka sorkar ka ka Open Cast Mining pat ka dei kaba ngi ngim lah ban pdiang namar kane ka rukom tih dewiyong Open Cast Mining ka long kum u shyieng ha kaba ngi lah ban jliah, ban sma hynrei ngim lah ban nguid, te ngi kwah ba ka sorkar kan wanrah da kiwei kiwei ki policy kiba long kum ki khlieñ, ki pasoh ba ki paidbah kin dup lah ban nguid ban bam, kawei ruh ka khubor nga kwah ban phah sha baroh ki paidbah ka East Jaiñtia Hills ba kim dei ban buh than ïa ka jingsngew lane ban ban long emotional than ïa kane ka mat, namar kane ka mat kam dei kata ka mat kaba ngi lah ban iaid da ka jingsngew , ngi sngewthuh bha ïa ka jingthngan jingsliang jong ki paidbah hynrei haba khatar snem ngi la ïaishah, te ngi na ka liang ka seng bad ki kynhun kiba don lang bad ka Jaiñtia Coal Minner and Dealer Association, ngi phah ka khubor sha ki paidbah ba kim dei ban shah ialam bakla da kata ka jingsngew namar ha ka kam dewïong hi, ban shna ïa ka policy kam dei ka kam kaba suk namar ngi ruh ngi sngewthuh ïa ka jingeh namar kane ka kam kam shong tang ha ka sorkar jylla, namar lada ngi phai ïa ka jingbishar jong ka iingbishar ba ha khlieh, ka Supreme Court ha u snem 2019 kane ka mat dewïong ka hap ha ka sokrar pdeng ruh, namar watla ka sorkar jylla ka la pdiang ïa ka Mining kaba ngi la pynkhreh na ka liang ka JCMDA hynrei ngi donkam pat ïa ka jingmynjur na ka sorkar pdeng.”
Shuh shuh u bah Sambormi Lyngdoh u kyntu ïa ki paidbaj ba kin iaishah bad ka JCMDA knang ba lyngba ka jingiatylli yn lah ban jop “ngi tieng ba ioh lehse kan don kano kano ka buit kaba na sha lyndet kaba kwah ban pyntlot ïa kane ka jingiakhih ka jong ngi da kaba pynpait pynpra, haba kren ia6 ka jingshisha, ngi iohi ba hadien kato ka rally kaba ngi la dep pynlong ha Khliehriat myn ha ka 7 tarik u bnai ïaiong 2026 kaba ngi lah ban ong ba ka dei kawei na ka rally bad jingiakhih kaba heh bha hapoh Jaiñtia ngi iohi ba ki don ki briew kiba la thaw ïa ki kynhun, ki Association bapher bapher, hynrei ngim don eiei ban ong ïa ki hynrei ngi shu kyntu ïa ki ba kin sngewbha ban wan ha kawei ka shatri khnang ba kan sur kan long tang kawei bad khnang ba kan nym ialam bakla ïa ka sorkar lane ïa ki paidbah bad khnang ba ka sorkar ruh kan iohi ïa ka jingiatylli ka jong ngi, namar lada ngi iapait iapra ka sorkar ruh kan nym shim khia ïa kane ka jingdawa ka jong ngi bad ngi sngew ruh ban kyntu ïa ki paidbah ba kin sngewbha ban iaishah bad ngi ha kane ka jingiaid lynti ha ka kam dewïong.”
Na ka liang u Vice President jong ka Jaintia Coal Minner and Dealer Association (JCMDA), u bah Justine Dkhar u la ai khublei ïa ki paidbah bad ïa ki sengbhalang kumjuh ruh ki seng bapher bapher kiba kyrshang ïa ka JCMDA ha ka jingiaid lynti ha ka kam dewïong, u la pynsngew ruh ïa ki kyrteng jong ki seng kiba kyrshan kiba kynthup ka East Jaiñtia Hills Coal and Minerals Supplier Association, ka Jaiñtia Students Movement, Khasi Students Union, Meghalaya People United Front, Jaiñtia Students Union, Jaiñtia National Council, Hynñiewtrep National Youth Front, Hima Sutnga Youth Federation, ka Hynñiewtrep National Youth Federation, ka Federation of Khasi Jaiñtia and Garo People, ka Synjuk ki Waheh Shnong East Jaiñtia Hills District, Truck Owners and Supplier Association EJHD, bad kiwei kiwei bad u la kyntu ïa baroh ki paidbah ruh ba kin iaishah lang bad ka JCMDA kumba ki paidbah ki la rai lang ha kato ka por ba long rally myn ha ka 7 tarik iaiong 2026 bad u la ong ruh ba hadien ba kut ka por kumba la iakut bad ka sorkar, ka Association kan sa khot biang ïa ki paidbah ban ïa rai lang halor kumno ban iaid shakhmat ha kaba ïadei bad kane ka kam trei dewïong ha Jaiñtia.