Ai jingïaroh u Management Representative ïa ka shnong Tuber bad Latyrke kiba lah ban pynneh ïa ka khuid ka suba

Khliehriat jylliew 6: Ka company Star Cement Lumshnong East Jaiñtia Hills District ha ka prokram jingrakhe ïa ka sngi pynneh mariang kaba dei ruh ka World Environment Day 2026, ka la pynlong ïa ki prokram bapher bapher ba kynthup naduh ka prokram thung dieng, ha kaba ki nongtrei jong ka company ki la thung da ki hajar tylli ki tynrai dieng hapoh u pud u sam jong ka company, la pynlong ruh ïa ka jingiaid rally ki nongtrei ka company da kaba rah iya ki baner, ki pla card kiba don ka jingthoh ba ïadei bad ka jingpynneh pynsah ïa ka mariang, la pynlong ruh ïa ka jingiakop dro dur ha kaba la ïa shimbynta lang da ki khynnah skul jong ka Star Public School, ki prokram ai jingpynshai bad kiwei kiwei.
Ïa kane ka prokram ba ïadei bad ka jingpynneh mariang ka company ka la pynlong ha ka shi taïew lynter bad la pynkut ïa kane ka prokram hynnin ka sngi hapoh Star Club jong ka Star Cement ha Lumshnong kum ka jingrakhe ïa ka World Environment Day 2026 , ha ka prokram baroh ki nongtrei jong ka company Star Cement ki la shim ruh ïa ki kyntien jingkular lane ka pledge kaba ïadei bad ka ban pynneh pynsah ïa ka mariang.
U Management Representative jong ka Star Cement, u Devender .K.Bansal haba kren ha ka jingialang u la ai ka jingiaroh ïa ka shnong Tuber Kmaishnong bad ka shnong Latyrke ki shnong kiba don ha East Jaiñtia Hills District bad ong ba ki dei ki shnong kiba lah shisha ban pynneh pynsah ïa ka khuid ka suba khamtam eh ha kaba ïadei bad ka jinglah jong ki ban pyniakhlad ia ki ñiut kiba pyut bad ki ñiut ki bym pyut, u la ong ruh ba kine ki shnong ki long ka nuksa bad nongmuna ïa kiwei kiwei ki shnong ruh, u kyntu ïa baroh ki nongtrei jong ka company ruh ba ki dei ban bud ïa ka nuksa na kine ki shnong khnang ban lait na ka jingsaphriang pathar ki plastik jot.
Shuh shuh, u Devender u la kren shibun kiei kiei kiba ïadei bad ka jingsniew ka jingphriang pathar ki plastik jot, u la ong ruh ba man ka por na ka liang ka company ka ju sam ïa ki jaka bret ñiut lane ki dustbin sha ki nongshong shnong bad kumjuh ruh sha kito ki nongtrei kiba sah hapoh company,na ka liang ka company ka la pynbiang ar tylli ki dustbin ha kaba ha kawei ka dustbin ki lah ban bret ïa ki ñiut kiba pyut bad ha kawei pat ïa ki ñiut ki bym pyut kum ki plastik ki bilor , u la ong ba na ka liang ka company ka lah ban wan kit ïa ki ñiut ki bym pyut na ki shnong ki shnong kata ynda ki la dep pyniakhlad lypa ïa ki ñiut bad ïa kine ki unit ki bym pyut yn thang ha ki clink lane hapoh ka ding kaba rhem bha kaba tylliat maw pynmih dewbilat ha company, namar na ka liang ka company ka ju leit kit ïa ki ñiut ki bym pyut na shnong Tuber Kmaishnong ban rah shapoh company ban thang ïa ki ha ka ding kaba rhem bha.
Na ka liang u Unit Head jong ka Star Cement, u Lokesh Kumar Bahety, u la kren halor ka jingdonkam ka um bad ong ba ka um ka long kaba donkam bad ka donkam ruh ban thung ïa ki dieng ha ka mariang khnang ba ka um kan neh kan sah, u la kren ruh shibun kiei kiei kiba ïadei bad ka jingdonkam ka um ha ka jingim u briew. Kiba la ai jingkren ha ka jingialang ki kynthup ruh u Senior General Manager jong ka Adiministration Hr CSR, u ba dei u Air Vice Marshal uba la shongthait, u R.V Ram Kishore bad kiwei kiwei.
La pynphuh pynphieng ia ka prokram da ki jingialehkai skit ba la pynbit pynbiang da ka Mine Department jong ka company bad ki khynnah skul jong ka Star Public School, ki skit bad ki drama ki don ka jingiadei bad ka phang ban pynneh pynsah ïa ka mariang bad ka la don ruh ka jingsam ïa ki prize sha kito kiba jop ha ki jingiakop bapher bapher kum ka drawing competetion, ka jingpule poetry bad kiwei kiwei ki jingiakop kiba iadei dur bad ka jingpynneh pynsah ïa ka mariang.