Khlem shongkli kti ka JCMDA ha kaba ïadei bad ka kam dewïong, 3 bnai ladep ai por ïa ka sorkkar

Khliehriat jylliew 03: Ka seng dewïong kaba na ri lum Jaiñtia, ka Jaiñtia Coal Minners and Dealers Association (JCMDA), hapoh ka jingialam u President, u bah Borin Shadap, ha ka jingialang ba la pynlong mynta ka sngi ka 3 tarik jylliew 2026 ka la ia mir jingmut halor ki kam kiba ka seng ka la iaid lynti, kata hadien ka General Meeting bad Rally paidbah kaba la long ha ka 7 tarik u bnai iaiong 2026 bad la sngewthuh ba ka JCMDA ka khlem shong kli kti ha kaba ïadei bad ka kam dewïong bad mynta ka seng ka dang ap ïa ka por kumba la ai por ïa ka sorkar ba kan leh ïa kaba donkam.
Ka jingai por jong ka seng ïa ka sorkar ka dei haduh lai bnai, kata naduh ka sngi ba la pynlong ïa ka rally paidbah ha Khliehriat kata naduh ka 7 tarik u bnai ïaiong 2026 bad ha kane ka sngi ba iaid rally ka seng lyngba u Deputy Commissioner ka East Jaiñtia Hills District, u Manish Kumar, IAS ka la aiti ruh ïa ka dorkhas sha u myntri rangbah ka jylla u Conrad Sangmaia.
Katkum ka jingpynsngew na u Vice President jong ka Jaiñtia Coal Minners and Dealers Association, u bah Justine Dkhar la ong ba ba “Ka seng hapoh kine ki sngi ka la dep ban pynkhreh ïa ka Draft Mining Plan kaba long katkum ka jingiaphylliew jingmut bad u Symbud Myntri rangbah ka jylla, u bah Sñiawbhalang Dhar, te ha kaba ïadei bad kane ka kam dewïong na ka liang ka seng JCMDA mynta ka dang ap ruh sa ïa kiwei kiwei ki seng trei dewïong kiba na ri lum Khasi bad Garo ban pyndep ïa ka Draft Mining Plan na ka bynta ban dup ioh ban phah lang ha kajuh ka por sha ki bor ba dei peit jong ka sorkar jylla”
La ong ba na ka liang ka seng JCMDA ka la dep ïa kynduh ruh ïa ki MLA kiba don na kane ka thaiñ jong ka East Jaiñtia Hills District ba kin pynioh ïa ka lad ban iakynduh bad u myntri rangbah ka jylla, shuh shuh ka seng ka la dep ruh ban ïa shong jingialang bad ki heh sorkar kiba na ka tnat DMR, jong ka sorkar jylla ha Office jong u Director of Mineral Resources bad ïa iakren halor ka jingpynkhreh (Preparation) ïa ka Mining Plan kaba kat kum ka jingiadei bad kane ka thaiñ ri lum Jaiñtia, shuh shuh ka seng ka la dep ïa shong jingialng ruh la haduh ar sien kynthih bad ka State Forum kaba dei ka seng dewïong kaba kynthup lang ïa baroh ki seng dewïong kiba hapoh ka jylla Meghalaya na ka bynta ban ïa treilang.
Ha kaba ïadei bad ka Draft Mining Plan (Small Underground Scientific Mining Plan) na ka liang ka JCMDA ka la dep pynpoi ïa ka Dratf ne jingtoh sha ka State Forum ban dup ioh leh ïa kaba donkam bad hadien ba la dep ban peit bad bishar bniah ïa ka Draft Mining Plan na Khasi Hills bad Garo Hills yn sa shna ïa ka Final Plan kaba long salonsar bad ïa kane ka Final Plan pat yn sa pynpoi sha u Myntri rangbah ka jylla.
U bah Justine Dkhar u la ong ruh “Lyngba ka EJHC & MSA kaba dei kawei ka kynhun ba ju ïa treilang bad ka JCMDA ngi la dep pynpoi ruh ïa ka dorkhas sha u U CEM jong ka Jaiñtia Hills Autonomous District Council, Jowai kaba don ka bor ba kan peit bad bishar bniah ïa kiei kiei kiba ïadei bad ka khyndew ka shyiap na ka bynta ban plie biang ïa ka jingtih dewïong”
“Kum ka jingpynkynmaw, ka JCMDA ka la ai por ïa ka sorkar jylla haduh lai bnai ban leh ïa kaba donkam bad kane ka jingai por ka seng ka long katkum ka rai jong u paidbah hi ha ka jingialang paidbah bad ha ka por ba pynlong ïa ka Rally paidbah bad kane ka jingai por kan kut ha u bnai naitung 2026” ong u Vice President JCMDA, u bah Justibe Dkhar.