Shillong, Jylliew 3: Ki paidbah nong shong shnong kiba don jaka ha Thad Laskein, Nongkhroh kila shah shet kylla ka bai jaka ha ka jingpyniaid ïa u Gas Pipe Line da ka Indradhanush Gas Grid Limited (IGGL) na Guwahati-Shillong-Silchar.
Haba ïa kren bad ki lad pathai khubor, u Bah Disparsing Rani uba dei u nongwad RTI u la iathuh ba ha ka por ba u ïa kren bad ki trai jaka ba une u gas pipe line u iaid lyngba ki iathuh ba ki khmih lynti ban ioh kumba 15 tyngka shi square feet.
Hynrei haba wad RTI na ka ophis u Deputy Commissioner ka West Jaintia Hills u la ong ba na ka T. 15 spah ka poi pynbna sha ka T. 50 ne 60 tyngka shi square feet bad kane kadei ka jubab na ka RTI ong u Bah Disparsing.
Halor kane u Bah Disparsing u la ong ba kadei ka kamram jong ka sorkar ban khein ïa ka bai jaka bad u la pyntip pat ha kaba iadei bad ki jaka ba pyniaid ïa ka western bye pass ki trai jaka ki ioh haduh T.500 ne 600 shi square feet bad u la buh ka jingkylli ba balei tang T. 50 tyngka ne don ki dalal kiba leh kum ki middle man ha kane ka kam.
Halor ka jingthmu jong ka sorkar ban shna da ka High Speed Caridoor u Bah Disparsing Rani u la kyntu ïa ki trai ba don jaka ba kin long kiba husiar ioh kin gat ei ha kum katei ka apot.
Shuh shuh u Bah Disparsing u la ong ba lada don ka hearing na ka liang jong u DC bad u BDO kidei ban ïathuh ïa ka dor jong ka jaka ym ban shu sngap namar ba ka pynsah umdum ïa ki paidbah.
Ha kawei pat ka liang, katkum ka RTI ba la ioh na ka ophis DC ka East Khasi Hills ha kaba iadei bad ka Bormanik Sunset halor ka jingiakurup jaka u Bah Disparsing u la iathuh ba katkum ka jubab na ka RTI ym shym la ioh ïa ki kyrteng.
