Pynmyntoi shikatdei eh ka Soft Skill & Well Being Camp ïa ki khynnah skul ha Rymbai bad Jalaphet

Khliehriat, K’lyngkot, 16: Kum shibynta ban saiñdur ïa ka lawei jong ki samla bad ki khynnah, ka ophis jong u Deputy Commissioner lyngba ka jingkyrshan na ka District Mineral Foundation (DMF) ha ka 14 tarik mynta u bnai ka la pynlong ïa ki prokram ba kyrpang ha shnong Rymbai bad ha Jalaphet, East Jaiñtia Hills District.
Ka phang pdeng jong ka Winter Camp ka dei ‘Ïa Ka Mynried’ kaba mut ka ïa ka Lawei, ïa kaba kum kane ka prokram la dep ruh ban pynlong ha Khliehriat dang ha ki bnai ba la leit.
Ki don haduh 291 ngut ki khynnah skul kiba la ïa shim bynta ha kane ka Soft Skill & Well Being Camp, ha kaba 147 ki khynnah kiba na ka skul Rymbai Government Secondary School bad 144 pat kiba na ka skul Jalaphet Circle Upper Primary School.
Kane ka prokram ka long ban ai jinghikai ïa ki khynnah kiba long ka lawei jong ka ri ha kaba la la buh thong haduh 1700 ngut ki khynnah ki dei ban ïa shimbynta ha kane ka Winter Camp. ïa kum kane ka prokram yn sa nang pynlong ha kiwei kiwei ki skul ruh kiba don ha East Jaiñtia Hills District bad ha kane ka Camp la ai jinghikai da ka AVENUES, Shillong.
Ha ka prokram ba la pynlong ha Jalaphet Circle Upper Primary School, ka MLA jong ka Sutnga-Saipung Constituency ka Kong Santa Mary Shylla ka la long kum ka kongsan bad ha ka prokram ba la pynlong ha Rymbai Government Secondary School, u MDC jong ka Rymbai Constituency u Bah Finelyness Bareh u la long u kongsan.
Haba kren ha ka prokram ha Jalaphet, ka Kong Santa Mary Shylla, ka la ong “nga kyrmen ba kane ka sienjam ba la shim da ka ophis jong u Deputy Commissioner kan plie ka lad ka lynti ban ai jingtip bad plie ka lad ka lyni bad ruh ba kan long ka lad ban kyntiew ïa ki sap ki phong jong ki khynnah kiba don ka sap bapher bapher. Kane ka dei ruh ka wat kaba ar jong ka Winter Camp ha East Jaiñtia Hills District bad ngin nang ïai bteng shuh shuh ruh ban wanrah ïa ki prokram kiba kham heh ha ki sngi ban sa wan.
Ka la pynpaw ruh ba kane ka camp ka la ïarap shibun ïa ki khynnah bad ka long kum ka rynsan ha kaba ki khynnah ki lah ban pyni bad pynpaw pyrthei ïa ki sap ki phong, ka ïarap ïa ki khynnah ba kin don ka jingsngew skhem bad kaba kongsan eh ka long ba kane ka camp ka pynlong ïa ki khynnah ba kin don ki jingmlien kiba bha bad kyntu ruh ïa ki khynnah ba ki dei ban kynmaw ba ki dei ban ong em ïa u drok.
Haba kren ha ka prokram ha Rymbai, u Bah Finelyness Bareh u la ong, “ka pynkmen ïa nga haba nga ïohsngew ïa ki jingkren bad jingïathuh na ki khynnah kiba la kren halor ka phang ba kumno ban ïakhun pyrshah ïa u drok. Nga kyntu ïa ki khynnah skul ba kin pynsaphriang ïa kane ka khubor sha kiwei ruh kum ka jingpynshai bad kum ka jingai mynsiem ïa kiwei ruh ba ki dei ban kiar na u drok ban ong em ïa u drok, namar mynta la nang jyllei kiba pyndonkam drok katba nang mih ki sngi. Kumta to ngin long ka nuksa ba bha ïa kiwei khnang ba ka imlang ka sahlang kan lait na kane ka khlam drok.”
Ha ka prokram ha Rymbai, ka Bornali Rabha ka khynnah kaba dang pule ïa ka Class 10, ka la pyni ïa ka sap rwai bad ong, “ban leh ïa kaei kaei ka dei kaba ngi hap ban ïatyngkhuh bad kiei kiei la ki dei kiba bha ne kiba sniew, kiba sngewtynnad bad ki bym sngewtynnad, haba kiei kiei ki ïaid bakla bunsien ngi sngewmong bad ngi sngew bitar namar ba ngim lah ban ïakhun pyrshah ha ka jingïaid lynti kumta ngi jied noh pynban ïa kiei kiei kiba sniew kum ka kyiad, u drok kiba lah ban pynjot pynban ïa ka jingim, hynrei da kaba ngi pynmlien ban pyrkhat bad leh ïa kaei kaei kiba bha kan ïarap shibun ban ïakhun pyrshah ïa ki jingeh bad ïalam sha ka lynti kaba dei bad hangne ngim pynmong ïano ïano bad ngim pynmong ruh ïalade, ngin ïaid ha ka lynti kaba bha”
U Treibor Dkhar uba dang pule ïa ka Class 10, na ka skul na Jalaphet u la ong “kine kiba wan ai jinghikai ïa ngi ki la hikai ïa kaba donkam bha ha ka jingim bad ki jinghikai kiba don jingmut ban pynpaw sha kiwei da kaba khublei kti, ka rukom peit ki khmat haba kren ïa kiwei, bad nga la ïoh shibun ki jinghikai na kane ka winter camp, la hikai ruh kumno ban sngew skhem haba kren bad shibun kiei kiei kiba bha bad kiba donkam”
Ha ka prokram ha Rymbai Government Secondary School, nalor u kongsan la ïa don ryngkat lang ruh u Assistant Commissioner East Jaiñtia Hills District, u Shiv Malviya, u SDO Khliehriat, u Principal jong ka Rymbai Government Secondary Schooland, u Bah Younilas Lamare, ki nonghikai skul bad ki khynnah skul.
La sam ruh ïa ki syrnot sha baroh ki khynnah skul kiba la ïa shim bynta ha kane ka Soft Skill & Well Being Camp “Ka Mynried’
Nalor ka Kongsan, kiba la don lang ha ka prokram ha Jalaphet ki kynthup u SDO Khliehriat, u Aditya Verma, u Principal jong ka Jalaphet Circle Upper Primary School, u Fr. Royal Saldanha, ki nonghikai bad ki khynnah skul.
La sam ruh ïa ki syrnot sha baroh ki khynnah skul kiba la ïa shim bynta.