Sa ha Ri-Bhoi District pynkha ka AIGU ban peit ïa ka bha ka miat ki paid Garo

Nongpoh, K’Lyngkot 16: Da ka jingthmu ban peit kyrpang ïa ka bha ka miat ki paid Garo kiba shong ba sah ha ka them Ri-Bhoi, ki nongïalam ka All India Garo Union (AIGU) mynta ka sngi ki la hiar ka thaiñ Byrnihat ban pynskhem ïa ki nongïalam ba pura jong ka AIGU Ri-Bhoi Regional Unit ha ka jingïalang kaba la long ha ka shnong Dehal Bagan, Byrnihat.
Ki nongkitkam ba hakhmat jong ka AIGU RI-Bhoi Regional Unit ba la pynskhem mynta ka ssngi ki kynthup ïa u Sungmoon Marak kum u Adviser, Simion Marak President, u Karan Marak General Secretary bad kiwei kiwei bad ïa kitei ki nongïalam ka Ri-Bhoi Regional Unit la wan ban pynskhem da u President ba rangbah ka seng u Albert Marak, ryngkat ki jing duwai khnang ba kine ki nongkitkam ba thymmai kin lah ban shakri bah bad khamtam ban wanrah ka jingïajan bad ïa ïeid hapdeng ki ajitbynriew Garo kiba shong ba sah ha ka them Ri-Bhoi.
Ha kane ka sngi la wan ruh ban ïa shim bynta lang da ki nongïalam ka All Assam Garo Union, ka Garo student Union, ka All khasi Hills Achick Federation, ki rangbah shong ki longkmie longkpa bad ki samla jong ka thaiñ Byrnihat.
Na ka liang u Albert Marak u la ong ba ka thong hi jong ka AIGU ban pyniar ïa ka tnad treikam sa ha Ri-bhoi District ka long ban wanrah ka jingïatylli hapdeng ki paid Garo kiba shong ba sah ha kylleng ka dong Ri-Bhoi khlem da khleh politik eiei bad ai ruh ka jingkhublei ba kyrpang ïa baroh ki nongïalam kiba la mih shakhmat ban don ka mynsiem ban shakri ïa ka jaitbynriew bad kyrmen ba kitei ki nongïalam kin lah ban lum ban lang bad ai ka jingshakri kabab ha tam na ka bynta ki jaitbynriew Garo khamtam ha ka eh ka shon.