ïoh ophis treikam pura ka Ri Bhoi Shatei Presbytery, aiti u MLA da ka Ambulance bad Work Order

0

Nongpoh, K’Lyngkot 15: Ka Ri-Bhoi Shatei Presbytery ha ka jingïaid lynti ban kynjoh ïa u mawmer ba 25 snem mynta u snem naduh ba la sdang ïa ka ha u snem 2000 ka la ioh ban plie paidbah syndon ïa ka ophis treikam ba pura ha ka shnong Pahamlapong, Nongpoh ban buh ïa ki jaka treikam bad kumjuh ruh ka Board of Music Institute ban ai jinghikai ïa ki khun samla kiba thrang ban tem bad rwai.
Ïa katei ka ophis building la tei ha ka jinglut kaba 61 lakh tam ba la wan ruh ban plie paidbah da u MLA ka Nongpoh u Bah Mayral Born Syiem ha ka jingdonlang u Bah Balajied Ranee MDC ka Nongpoh, u Rev SBn Teron Moderator ka RBP Synod, Tbn RR Pamshong Moderator ka Ri-Bhoi Shatei Presbytery, ki Pastor, ki Tymmen Basan bad kiwei kiwei.
Ha katei ka juh ka sngi na ka liang u MLA u la aiti ruh ïa ka Ambulance sha ka Presbytery ban ai jingshakri ïa ki paidbah kiba pang ba shitom ba la mang kyrpang da ka skhim CMSDF jong u snem 2024-2025 bad kumjuh ruh ka work order kaba T.5 lakh ban ioh pynheh shuh shuh ïa katei ka building treikam jong ka Presbytery.
Haba kren ha katei ka sngi na ka liang u MLA u Bah Mayral Born Syiem u la pynpaw ba kane ka jinglah jong ka Ri-bhoi Shatei Presbytery ban plie paidbah ïa ka ophis treikam kaba pura ka pynpaw ïa ka jingnang kiew jong ka Presbytery katba nangmih ki sngi, namar kumba la pynpaw da ki pastor ha ki por ba la dep ym shym lah ban mutdur ba katei ka iing kan ieng ha katei ka jaka kumba ka long mynta hynrei u Blei um shym la iehnoh ban kyrkhu na kawei ka sngi sha kawei pat lyngba ka jingiohi jngai jong ki nongkitkam ka Presbytery.
Kum u MLA u la pynpaw ruh ka jingsngewkmen ba la ioh ruh ban aiti da ka Ambulance sha ka Presbytery ban long kum ka jingsah kynmaw jong ka jingdap 25 snem ka jingïaid lynti jong ka Ri-Bhoi Shatei Presbytery ban ai ka jingshakri sha ki paidbah kumba la pynsngew da ki nongïalam bad aiti ruh ïa ka Work Order kaba T.5 Lakh ban ioh pynheh shuh shuh ïa katei ka ophis building bad kum u MLA un iai don ryngkat bad ka Presbytery na ka bynta shibun ki kam pynroi bad ki jingdonkam kiba hakhmat.

Leave A Reply

Your email address will not be published.