Ban kyntiew ki kam jngohkai, shim bynta ka MTDC ha ka The Gypsy Festival ha Mumbai

Shillong, K’ Lyngkot 16: Ka Meghalaya Tourism Development Corporation (MTDC) ha kine ki sngi ka la lah ban donlang hapoh ka premium exhibitor ka prokram The Gypsy Festival kaba la pynlong ha ka 11 bad 12 tarik mynta u bnai hapoh ka Jio World Drive, Mumbai. Kane ka rynsan ha ka pyrthei kadei kaba la leh na ka bynta ban kyntiew ïa ki kam kiba ïadei ïa ka jingïaid jingïeng ha kaba ha kane ka prokram la ïashim bynta da kiba bun na kylleng jong ka pyrthei bad kumjuh ruh na ki bynta bapher bapher jong ka India, ha kaba kane ka tyrwa ïa ka lad ban pyni ïa ka jingkhring jong ka Meghalaya ïa kiba wan jngohkai pyrthei, ka jingdon ki tiar kiba kyrpang bad kumjuh ka jinghiar pateng jong ka kolshor bad la ong ba ka Meghalaya ka la dei tang ma ka kaba la mihkhmat ïa ka India ha kane ka prokram.
Ka Mumbai, kaba la paw pyrthei hapoh ka ïew jong ki kam jngohkai, ka la long kawei na ki lad jong ka Meghalaya Tourism Development Corporation ban pyni ïa ka jinglong bapher bad kaba kyrpang haba ïadei bad ka kam ka tem ka put, Arts, Culture bad Crafts. Wat hapdeng ki jingdon jong ki lad, ka jingriew spah jong ka Meghalaya haba ïadei bad ka jinghiar pateng ka kolshor bad ka jingïoh mad kaba kyrpang kaba la ïohi ba la don u pud ban pynpaw sha ki ïew kiba heh jong ka ri.
Ka jingïashim bynta hapoh ka TGTF kam shym la shah ïa ka sorkar Meghalaya ban phai sha kane ka jingpeitkai, ka pynthaba ïa ka jingbha jingmiat kiba ka jylla ka tyrwa bad ka jingïadon bynta kaba don jingmut bad ki nongleit nongwan.
Hapoh ka jingïalam kaba ïohi jngai jong u Bah Alan West, Director ka MTDC, ka jingïashim bynta jong ka MTDC ka la pyni ïa ka jingangnud jong ka jylla ban kyntiew ïa ka karkhana jngohkai sha ka kyrdan kaba ïa ryngkat bad ki ri ka pyrthei. Ka jingmih khmat jong ki dkhot ka MTDC ka kynthup ïa ki nongtrei kiba la aiti bad ki nongïarap halor ka jingdon ki trai shnong kiba ïaid bad leit sha ki jaka jngohkai kiba la shim ïa ka bynta kaba kongsan ha ka ban kyntiew ïa ki kam jngohkai ha kane ka jylla Meghalaya.
“Ngi ngeit skhem ba ka jingïashim bynta jong ka Meghalaya ha kane ka prokram The Gypsy Travel Festival, da kaba pyni ïa ka sap ha ka tem ka put, ka Arts, Culture & Crafts kan sa kyntiew ïa ka kolshor ki trai ri trai muluk na ka bynta ban poi sha ka thong. Kane ka rynsan jong ka tamasa ka pynthikna ban pyndon ka jingpynïasoh haba ïadei bad ki kam shang pyrthei sha ki jaka kiba duna kiba tip bad kumjuh ruh ki kolshor, ka put ka tem kiba don ka jingïadei bad ka jingkyntiew ïa ka Meghalaya kum ka jaka riewlum kaba don ka kolshor kaba kyrpang,” ong u Bah Alan West Kharkongor uba la ïalam ïa ka kynhun jong ka Meghalaya sha kane ka prokram.
Ki nongleit jingleit ne ki tour operator kiba mihkhmat ïa ka Meghalaya ki kynthup ïa u Bah Gerald Samuel Duia jong ka Duia Trailblazers, u Bah John M. Wankhar na ka Walk With Nine Lives, ka samla Vanessa A. Sangma na ka Merak Tours, kumjuh ruh ka kong Dareen Sawkmie bad ka kong Rapkika Kharmawlong na MTDC.
Kine ki nongsengkam lajong ki la pyni ïa ka jingtip jong ki ha ka leit jingleit kum ka community-based tourism, culinary tours, agri-tourism, Eri Silk trail, bad ki eco-adventure kiba don ka jingïadei katkum kane ka por kaba mynta. Ka jingïashim bynta jong ki ym tang ba ka la pynheh ïa ki kam jngohkai jong ka Meghalaya hynrei ka pynïar ruh ïa ka jingdon ka jingïadei kaba don jingmut bad ki nongshong shnong, ki nongthoh khubor, ki travel writer bad kiwei kiwei.
U Bah Duia, uba la shem phang bha ha ki kam jngohkai u la ong ba kane ka tamasa ka long kaba kit jingmut bha kaba kyntiew ruh ïa ka jylla Meghalaya.
Kumjuh ruh u Bah Wankhar, kum u tour operator ba la tbit, u la ong ba kane ka The Gypsy Travel Festival ha Mumbai ka la dei kawei na ka best travel fair kaba u la ïashim bynta. U la ïaroh ïa ka jingpynlong ïa kane ka prokram kaba long kaba donkam bha.
Ïa ka tamasa la pynshong shit da ka tem ka put tynrai napoh ka band Summer Salt. Ka jingïashim bynta ka MTDC hapoh ka The Gypsy Festival ka dei ka sienjam ban ïaid shakhmat ban kyntiew ïa ka Meghalaya kum ka jaka kaba khring bha ïa kiba wan jngohkai na kiwei ki jylla bad ka ri. Kane ka jingsdang ka pynphalang ïa ka jingangnud ka jylla ban pynneh ïa ka kam jngohkai bad kumjuh ruh ban kyntiew ïa ka Meghalaya tourism sha ki kyrdan jong ki ri ka pyrthei.