Jluk sha ka NPP pynïasoh u Bah Paul, Bah Renik bad Bah Nujorki, 36 ngut ki MLA kiew ka NPP

Shillong, Risaw 19 : Ka sainpyrthei ha ka jylla ha ka sngi Nyngkong ka la sakhi sa kawei pat ka jingkylla hadien ba lai ngut na ki saw ngut ki MLA ka UDP ki la shim ïa ka rai ban leit tyrwa pynïasoh noh sha ka National People’s Party, ka party kaba ïalam mynta ïa ka bor synshar ha ka Jylla.
Lah ban kdew hangne ba tang hapoh shibnai, ka UDP kaba don 12 ngut ki MLA ka la duh noh pat haduh 11 ngut hadien ba 8 ngut na kine ki la leit ban pynïasoh sha ka BJP ha ka 23tarik u Nailur mynta u snem hapoh ka jingïalam jong u Bah Lahkmen Rymbui. Katba 3 ngut kiwei pat ki la pynïasoh sha ka NPP ha kane ka sngi Nyngkong.
Kine ki lai ngut ki kynthup ïa u MLA ka Shillong West Bah Paul Lyngdoh, MLA ka Mawkyrwat Bah Renikton Lyngdoh Tongkhar bad ruh u MLA ka Mookaiaw Bah Nujorki Sungoh.
Da kane ka jingpynïasoh, ka jingdon jong ki MLA ka NPP ha ka Ïingdorbar Thawaiñ kaba don 60 ngut ki dkhot ka la kiew sha ka 36 ngut, katba ka UDP ka sah sa tang uwei u MLA uba dei ruh u President jong ka Party, Bah Metbah Lyngdoh.
Ha kane ka sngi, u Bah Paul Lyngdoh bad u Bah Renikton Lyngdoh Tongkhar ki la ïakynduh markhmat ïa u Lamphang ka Ïingdorbar Thawaiñ, u Thomas A. Sangma, bad aiti ïa ki kot pan pynïasoh katba na ka liang uBah Nujorki Sungoh um shym la lah ban leit lang namar ba u dang don hapdeng ka jingshah sumar.
Ïa kine ki lain gut la synran lang da u President ka NPP ha ka jylla, u Bah Prestone Tynsong, nangta u National Vice President ka NPP Bah Sniawbhalang Dhar, bad kiwei pat ki nongïalam jong ka party.
Haba kren sha ki lad pathai khubor, u Bah Prestone u la ong ba ka jingdon jong ki MLA ka NPP ka la kiew sha ka 36 ngut, hynrei ka rai kaba khatduh halor ka jingpynïasoh ka shong ha u Lamphang.
“Ngi pynpaw ïa ka jingkyrmen ba u Lamphang un ai ïa ka rai kaba biang hadien ka jingbishar ïa ki kot pynïasoh,” u la ong.
Ha kaba ïadei bad ka jingpdiang pura ïa ki MLA sha ka NPP, u Bah Prestone u la ong ba ka party ka dang pynbeit ïa ki jingdonkam bad kan sa pyntip hadien.
Haba kylli halor ka jingkylla ïa ki Myntri Sorkar, u Bah Prestone u la kyntait ba ka jingpynïasoh ka don jingïadei bad ka jingthmu ban ïoh shuki Myntri.
“Kane kam dei da ka jingthmu ban ïoh ïa ka shuki Myntri. Kumba u Bah Paul Lyngdoh u la kdew, ki don katto katne ki nongrim kiba ki sngew ba ka NPP ka lah ban pynbeit. Kam don kano kano ka jingbuh kyndon lypa,” u la ong.
Haba kylli la u MLA ba marwei jong ka UDP un dang ïoh ban bteng kum u Myntri Sorkar, na ka liang u Bah Prestone u la jubab ba ka dei ka kam jong u President ka UDP ban jubab ïa kata.