Dang bishar u Lamphang ïa ki kot pynïasoh jong ki lai ngut ki MLA ka UDP sha ka NPP

Shillong, Risaw 19: U Lamphang ka Ïingdorbar Thawaiñ ka Meghalaya, u Thomas A. Sangma, ha ka Sngi Nyngkong u la pyntip ba u dang bishar ïa ki kot bad ki sla kiba ïadei bad ka jingpynïasoh jong ki lai ngut ki MLA ka United Democratic Party (UDP) sha ka National People’s Party (NPP), shwa ban shim ïa ka rai halor kane ka kam.
U Lamphang u la ong ba ïa ki kot tyrwa pynïasoh la aiti da ki MLA ba kynthup ïa u Bah Paul Lyngdoh, u Bah Renikton Lyngdoh Tongkhar bad u Bah Nujorki Sungoh, ryngkat bad ki rai jong ka party.
“Nga la pdiang ïa ki kot pan pynïasoh. Namar ba ki la wan aiti hi ha nga, nga la pdiang ïa ki. Ngam pat shym la ai jubab ïa ki namar ba nga donkam ban pan jingmut shwa,” u la ong.
U la pynshai ba watla u la dep ithuh ïa ka jingpynïasoh jong phra ngut ki MLA dang shen hynrei haba ïadei bad kane ka mat mynta u la ong ba un hap ban bud ryntih ïa ki rukom treikam bad ki kyndon kiba treikam kiba donkam.
“Nga hap ban bud ïa ki rukom treikam bad ki kyndon kiba dei. Nga la pyntip ïa ki ba ngan bishar ïa kane bad pyntip sha ki hapoh katto katne sngi,” u la ong.
Haba kylli halor ka jingkheiñ ïa ki MLA bad ka jingdon jong ki dkhot ban pynïasoh, u Lamphang u la ong ba katkum ka jingkheiñ, ka jingdon jong ki dkhot ka palat ïa ar bynta na lai, hynrei kam pat long kaba suk ban shim ïa ka rai khlem da pan jingmut shwa katkum ki kyndon aiñ.
“Katkum ka jingkheiñ, ka palat ïa ar bynta na ki lai bynta, hynrei kam long kaba suk kumta. Nga hap ban pan jingmut katkum ki kyndon aiñ bad sa ai ïa ka rai ha ka por kaba dei,” u la ong.
U Lamphang u la pyntip ruh ba na ki lai ngut ki MLA kiba la aiti ïa ki kot pynïasoh, u la lah ban ïakynduh tang ar ngut ha ka Sngi Nyngkong namarba la pyntip ïa u ba u Bah Nujorki Sungoh u don shabar ka jylla na ka bynta ka jingsumar.
U Lamphang u la ban jur ba ka long kaba donkam ban pynshisha da lade ba uwei pa uwei u MLA u la ai ïa ka jingmynjur ban pynïasoh sha ka NPP da ka mon laitluid jong u, bad u dang hap ban ap ïa ka jingpynshisha jong u Bah Nujorki.
“Na ki lai ngut ki dkhot, tang ar ngut kiba la wan mih hakhmat jong nga mynta ka sngi. U Bah Nujorki Sungoh u don shabar ka jylla na ka bynta ka jingsumar ïa ka koit ka khiah. Kumba nga la leh mynshwa, nga hap ban pynshisha da lade ba uwei pa uwei u dkhot u la mynjur ban pynïasoh da ka mon laitluid jong u. Nga hap ban ap ïa kata,” u la ong.
Haba kylli la lah ne em ban pynshisha ïa ka jingmynjur jong u Bah Nujorki lyngba ka jingïakren online, u Lamphang u la ong ba ki don katto katne ki lad ban leh ïa kata. Hynrei, un hap ban pan jingmut halor ki kyndon aiñ shwa ban rai la ka jingpynshisha lyngba ka online ka biang ne donkam ba u MLA un wan mih hi hakhmat jong u.
“Ki don katto katne ki lad. Ha kine ki sngi, ki muktiar ki lah ban mih lyngba ka online wat ha ka Supreme Court bad High Court. La ngan lah ban pynshisha ïa ka jingmynjur jong u ban pynïasoh lyngba ka online ne donkam ïa ka jingwan mih hi jong u, nga hap ban pan jingmut katkum ki kyndon aiñ halor kata,” u la ong.