Kyrpad ka CPC na ka bynta ka lehkmen Durga Puja kaba suk, hadien ka jingjia haMawbah

Shillong, Risaw 19: Ka Central Puja Committee (CPC) ka la kyrpad ïa ki nongshong shnong ha kylleng ka jylla Meghalaya ba kin pynneh ïa ka shongsuk shongsain bad ka jingiatylli ha ka por Durga Puja, namar ba ki bor pyniaid district bad ki pulit ki la pynjur ïa ka jingpahara hadien ka jingjia kaba dang shen ha Mawbah.
U President ka CPC, u Naba Bhattacharjee, u la buh ka jingkyrpad hadien ka jingïalang bishar bniah ba ha khlieh duh bad u Chief Secretary u R. Telang bad ki ophisar ba ha khlieh duh jong ka sorkar.Ka jingialang ka la long ban pynkhlain ïa ka jingpahara ha ki sngi kiba dang sah jong ka bal eh Puja, khamtam ha ki por mynstep bad ha ki por ba pynngam ïa ki bleithaw.
U Bhattacharjee u la ong ba ki bor synshar ki la jubab ïa ki jingkyrpad jong ka committee ban pynkhlaiñ ïa ka jingïada bad ban weng ïa ki jingeh jong ki paidbah.
“Ka la long ha ka nongrim ban pynkhlain bad pynbha ïa ka jingpahara ha ka por Puja bad ha ka por ba pynngam, bad khamtam ha ki por mynstep… khnang ba ki nongmane kin leit sha la ki jong ki jong ki pandal bad ban rakhe bad leh sngewbha ïa ka Puja ha ki ar sngi ban wan”, la ong u Bhattacharjee.
Da kaba pynksan ïa ka riti dustur jong ka Shillong jong ka jingïatylli ha ka imlang sahlang, u la kyntu ïa ki briew na baroh ki jaitbynriew ban rakhe ïa kane ka tamasa da kaba suk bad ban ïatreilang bad ki bor synshar.
“Nga tharai ba baroh ki kwah ïa ka jingrakhe Puja kaba suk, khlem da kheiñ ïa ka jaitbynriew bad ka jingngeit.Ka Shillong khamtam ka la pyni ba ngi don ka jingïatylli hapdeng baroh ki bynta jong ki paidbah… hynrei ha man la ka imlang sahlang, man la ka shnong, man la ka nongbah, phi don ïa ki jinglong kiba pyrshah ïa ka imlang sahlang,” u la ong.
U Bhattacharjee u la kyntait ruh ïa ki khubor kiba pynpaw ïa ka jinghiar ka jingïashim bynta ha ki tamasa.U la ong ba ki pandal ha kylleng ka nongbah Shillong, kynthup ïa kito kiba don ha surok Keating bad Oakland Road bad kumjuh ruh ka pandal Gorkha Durga Puja, ki dang ïai bteng ban khring ïa ki paidbah kiba bun.
U la pynskhem ba watla ki jingjia kiba rit ki la pynmih ïa ki jingtieng hynrei ki briew ki dang ïamih paidbah ban rakhe ïa kane ka tamasa.
Na ka liang jong ka Central Puja Committee, u Bhattacharjee u la ai khublei lehkmen ïa ki paidbah ka jylla Meghalaya, da kaba kitbok kitrwiang ïa ki ba kin ioh ïa ka Durga Puja kaba suk, kaba roi bad kaba shongshit.