Pynmih dohksah ki nongïalehkai ha ka ïakob rah maw, shongshit ki jingïalehkai tynrai

Shillong, K’Lyngkot 18 : Ka jingwanrah ïa ki jingïalehkai tynrai ha ka Meghalaya Games kaba long ha Tura mynta ka samoi ka la pynshongshit ïa ki nongwan peit ha katei ka lympung namar ha ka sien kaba nyngkong kin sakhi ïa kum kitei ki jait jingïalehkai kiba kham phylla nalor ka ïakob mareh, ïakot siat khnam ne ïa ïalehkai phutbol.
Kitei ki jingïalehkai tynrai ba pynlong ha kane ka sngi ki kynthup ïa ka jingïalehkai Mawpoiñ na rilum Khasi, nangta ka rah maw lane ka Rah Moo Khrah na rilum Jaiñtia bad ka Wa’pong Sika na rilum Garo.
Ha ka jingïakhun final jong ka Wa’Pong Sika, u Pangrak R. Marak ka West Garo Hills District u la long u lahduh, bud sa u Lambai Challam na West Jaintia Hills District bad ba wan balai dei u Wanlamrhamiki Passah na katei ka juh ka distrik kata naWest Jaintia Hills District.
Katba ha ka jingïakhun jong ka Mawpoiñ jong ki kynthei, ka kynhun ïalehkai ka East Khasi Hills District ki la lah ban pynliem noh ïa ka West Garo Hills District. Katba ka kynhun ba wan balai dei ka West Jaintia Hills District.
Ha ka jingïakhun jong ki shynrang pat ka kynhun ïalehkai jong ka East Khasi Hills District ki la lah ban pynliem noh ïa ka West Garo Hills District ha ka jingïakhun kaba itynnad bad kaba ïakhaid bha.
Ha ka ïakop Rah Moo Khrah kaba para marwei ki shynrang, u Da Oo Hi Dhar ka West Jaintia Hills District u la long u nam tam ha ka jingïakhun, bud pat da u Me-U-Ru Suna na ka West Jaintia Hills District bad u Vincent Bareh na ka East Khasi Hills District u la wan balai.
Katba ha ka ïakop ïalehkai kynhun sa shisien pat ka kynhun ïalehkai jong ka West Jaintia Hills District ba la lamkhmat da u Baphin Nongrum, Shanlangki Lyngdoh, Callten Sari, Me-U-Ru Suna bad u Da OO Hi Dhar ki la long ki nongjop ha ka jingïakop da kaba pynliem ïa ka kynhun jong ka East Khasi Hills District ba la mihkhmat da u Janaising Marbaniang, Arkystar Kharkamni, Riangpor Kharkongor, Vincent Bareii bad u Arjun Thabah.