Mynta yn sdang ka ïew janmiet ha Nanpolok, yn don ruh ki nongtem bad ki jingpyni nam

Shillong, K’Lyngkot 18 : Ka Sorkar Jylla ka la pynbna ba kan sdang noh ïa ka ïew janmiet ha Nan Polok Shillong naduh ka sngi Thohdieng, ka 19tarik mynta u bnai naduh ka por 5:00 baje janmiet haduh ka por 9:00 baje kata naduh ka sngi Nyngkong haduh sngi Saitjain.
Katkum ka kyrwoh na ka sorkar jylla, la pyntip ba ïa katei ka ïew janmiet yn sdang naduh ka 19tarik bad kan neh pat haduh ka 31tarik u Lber mynta u snem. La ïathuh ruh ba kane ka projek kadei ka sienjam ba la shim da ka Meghalaya Tourism Department bad la pyntreikam pat da ka Meghalayan Age Ltd.
Shuh shuh la pyntip ba nalor ka ïew janmiet kan don ruh ka jingpyni nam ïa ki tiar shna hi, nangta ka jingpyni nam ïa ki jingdro bad ruh ïa ka sap ba kyrpang kaba ki nongshong shnong ki don.
Kan don ruh ki jaka ban die ïa ki marbam bad mar dih tynrai kiba la pynkhreh khlem da khleh kino kino ki kynja dawai, nangta ki jaka die ïa ki ashar, ki musla nalor ki tiar ba shna da ki siej bad kiwei kiwei de.
Na ka liang ka Meghalaya Grassroots Music Project (MGMP) kan plie lad ruh ïa ki samla ka Jylla ban pyni ïa ka sap ba ki don haka put ka tem bad rwai ban pynjah thait ïaki nongwan ïew.
Nalor kine kin don ruh ki dukan bad kiwei ki jingpyni nam na ka bynta ban khring bad ïa ki nongwan ïew lane kiba wan ban peit kai ïa katei ka ïew janmiet kaban long ruh shi bynta ban pyni nam ïa ki mar ki mata jong ki nongshong shnong bad ruh kum ka jingkyrshan ïaki nongrep, ki nong sengkam lajong, ki nong shna jingshna bad ki nongrwai.
La ong ruh ba ka thong jong ka ïew kadei ban ailad ïa ki paidbah bad ïa ki nongwan shangkai suwari ban pynjahthait ïalade daka ba wan shang pyngad ha ka ïew janmiet ha Nan Polok.
Ka kyrwoh ka ong ruh ba ka bai rung sha katei ka ïew kan long 100 tyngka marwei ïa kiba la rangbah bad kaba ïohnong na kane yn synñiang pat sha ki kynhun lane ki jaka treikam kiba trei na bynta ka bha ka miat jong ki paidbah.