Shillong, K’Lyngkot 18: Ka Hynñiewtrep National Youth Front(HNYF) East Khasi Hills District ka la pynpaw ka jingsngewkhia bad ka jingpynrem jur ïa ka jingbym shimkhia jong ka sorkar jylla ha kaba ïadei bad ka bam ka dih jong ki nongïalehkai bad ka rukom pynïaid ïa ka Meghalaya Games 2024 kaba la long hapoh Tura.
Ka seng lyngba u Secretary ka seng, u Bah Steve R. Khyriem, u la ong ba ka rukom ai bam jong ka tnad ïalehkai ka long ka bym ïahap satia bad kum ïa ki nongïalehkai, ka tnad ka dei ban ai da ki jingbam kiba tei ïa ka met ka phad jong ki.
Ka seng ka la ong ba ka jingai jong ka tnad ïalehkai da ki jingbam ki bym ïahap bad ki bym tei ïa ka met ka phad ka long ka bym ïahap satia hangno-hangno ruh ha kaba la ïohi ba ki nongïalehkai ki la ïoh tang khyndiat ka bam kata ruh da ki jingbam pyndap lyer suda bad ka seng ka la pynpaw ruh ka jingdom bad ka jingbitar ban ïohi ba ïa ki pliang bam jong ki khynnah ïalehkai shapoh Tura la sait bad pynkhuid da u brut paiñkhana.
Shuh shuh ka seng ka la ong ruh ba ha ka jingwan ïuhkjat jong ka President ka Ri hapoh ka jylla ha ka 15 bad ha ka 16 tarik u bnai Kyllalyngkot 2023 ban plie paidbah ïa ka Meghalaya Games 2024 hapoh Tura, ka la kylla long pynban kaei kaei kaba pang met namar ba ki kali kiba kit ïa ki heh ki haiñ jong ka sorkar, ki la ïuh naphang ïa ki mrad ha ki surok ki syngkien ha kaba la ïohi ba ki la ïuh ïa u ksew bad ïa ka blang namar ka jingpynher sted ïa ki kali jong ki wat haba ym don satia kino-kino ki kali ne ki paidbah kiba ïaid ba ïeng ha katei ka por.
“Ban ai jingbam ïa ki nongïalehkai da kito ki jingbam pyndap lyer kam ïahap hynrei phi hap ban ai da ki jingbam kiba tei, nangta ka jingsait ïa ki pliang da u brut shut paiñkhana ka long ka bym ïahap bad ka jingïaid jong ki heh sorkar ha ka surok ban ïuh ïa ki mrad ka ruh long pynban kaba ïalam sha ka jingduh ïa ki mrad”, la ong u Bah Khyriem.
U Bah Khyriem u la buh jingkylli ba kumno u Myntri ka tnad ïalehkai um lah satia ban khmih bad peit bha halor kine kiei-kiei ki jingjia kiba jia hapoh Tura.
U Bah Khyriem u la ong ba ka sorkar ka la mang haduh T. 23 klur na ka bynta ka Meghalaya Games 2024 hynrei ka tnad ba dei khmih kam lah tang ban pynbit pynbiang ka bam kaba biang tam ïa ki nongïalehkai bad ka jingjia kumne lehse, ka dei ka jingbamsap jong ka sorkar.
Ka seng ka la dawa ba ka dei ban don ka jingtohkit ïa ka tnad ïalehkai jong ka jylla bad kumjuh ruh ïa ki nongpynïaid kiba kitkhlieh khlem da pynïaid bha bad hap ban shim da ki sienjam kiba tyngeh ban pynshitom ïa ki.
