Shillong, K’lyngkot, 18: Ka jingai mynsiem bad ka jingkmen ka la paw ha ka Meghalaya Games 2024 haba ka Kong Marbarisha M. Pdah, 44 snem ka rta ka la hap ban pynbit pynbiang ïalade ban ïakhun ha ka jinglehkai syndah lang bad ka khun kynthei ka samla Toïaibha M. Pdah, 24 snem ka rta bad kine arngut kin ïakhun lang ha ka jingïakob siat suloi ha ka Senior Women’s Category ha ka 10meter bad 50 meter Rifle event bad kawei pat kan dei ha ka 10 meter bad 25 meter Pistol event.
Ka jingïaid lynti jong kine arngut ka pyni shai ïa ka jingkhlaiñ jong ka iing ka sem ban ïaid ryngkat lang na ka bynta ban pynurlong ïa ka jingphohsniew ka jong ki. Kane baroh ka la wan urlong hadien ba ka kong Marbarisha ka la sngew ïoh mynsiem na ka jingsngewtynnad jong ka khun ban siat pistol bad katba ki shalyntem ka por ki nang tyllun, ka Kong Marbarisha ka ju ïalam ïa la ka khun ban leit pyntbit ha ka jinghikai siat pistol.
Haba ïohi ba ka khun ka la nang kiew ha ka jingïalehkai ha ki jingïakhun bapher bapher, ka kong Marbarisha ka la sdang ban mih shakhmat ha ki kam lehkai. “Haba nga ïohi ïa ka Toïaibha ba ka ieng ha ka nongrim ban poi sha ka thong, kane ka pynskuiñ ïa ka mynsiem jong nga bad nga sngewthuh ba kam pat dier ka por ban beh ïa ka thong bad ban bud ïa ka jingphohsniew,” ong ka Kong Marbarisha, haba kren shuwa ban ïakhun ha ka 5th Meghalaya Games.
“Ka Meghalaya Games ka ai ïa ngi ïa ka kabu ban mih madan lang bad ban wanrah burom ïa ka jylla,” ka la bynrap.
Ka samla Toïaibha ka la pynpaw da kaba ong, “Kum ka khynnah skul, nga ju don bynta kum ka NCC cadets bad dei nangne ba nga la sdang ban sngewtynnad ïa ka jingïasiat suloi. I mei i ju ai mynsiem ïa nga ban leit sha ki NCC camps bad i ju ai mynsiem ruh ba ngan ïaid beit shakhmat ha ki jinglehkai siat suloi. Ha u snem 2016, nga ïoh ïa ka phone call na ka paralok bad ka la wer ïa nga ban rung dkhot ha ka Shooting Association. Ka dei ka jingkwah jong i mei ba ngan long ka nonglehkai. I ju synran ïa nga da leit lehkai ha Assam Rifles kaba don ha Happy Valley, Shillong. Ha kaba nyngkong, i ju sngew artatien ban rung lang ban lehkai namar ka rta, hynrei i ju synran ïa nga sha ki State/National Championship.”
