Shillong, K’lyngkot, 18: U Myntri ka tnat Kam Pohing ka Sorkar Pdeng u Amit Shah ha ka sngi Palei u la plie paidbah ïa ka Cyber Security Operations Centre ha Headquarter jong ka Assam Rifles ha Laitkor, Shillong ha ryngkat ka jingsakhi lang jong u Director General Assam Rifles u Lt. Gen P.C Nair. Ka Cyber Security Operations Centre kan pynkhlaiñ shuh shuh ïa ka Cyber Security jong kane ka tnat shipai na ka bynta ban peitngor, ban ïada na ki jingma kiba wan nabar bad ban khanglad ïa ka jingpynkheiñ ïa ka Assam Rifles Wide Area Network (ARWAN).
Ka Cyber Security Operations Centre ka dei kaba la pyndait da ki kor ki bor jong ka Art Network & Data Monitoring Devices kaba treikam baroh arphew saw kynta.
Kane ka Centre ka dei kaba nyngkong eh ban pyntreikam da ki bor pahara ka Sorkar Pdeng. Ka jingkynrei ki Cyber Crime ha kine ki sngi kan ïada na ki riew sniew kiba donkti ban leh ïa ki kam bymman.
U Myntri u la ïaroh ïa ka jingtrei shitom jong ka tnat shipai Assam Rifles kaba la pynkhlaiñ ïa ka jingpyntreikam ïa ki kor ki bor hapoh kane ka tnat shipai.
