Da ka surok rong plie u MDC na ka bynta ka Mass banyngkong u Lyngdoh ban shah kyntang

Shillong, K’Lyngkot 18 : Ka Sorkar Jylla lyngba u Deputy Chief Minister ba khmih ïa ka tnat PWD (Roads) ka la pynïoh da ka surok rong ha ka shnong Lum Mawtnum jong ka shnong Mawlai Mawtawar, bad ïa kane ka surok kaba la pynïoh kyrkieh da ka Sorkar la plie da u MDC ka Mawlai u Bah Teiborlang Pathaw ha kane ka sngi.
Ïa kane ka surok rong la pynïoh lyngba ka jingshimkhia jong u MDC ban buddien haduh ban da ïoh hadien ba ki nongïalam shnong kumjuh ki nongïalam ka Balang Catholic Mawlai Parish ki la pynsngew ïa ka jingdonkam kyrkieh bad kyrpad ïa u MDC ban ïarap lang.
Ka jingwanrah ïa kane ka surok ka long na ka bynta ban ai jingmyntoi ïa ki nongshong shnong bad khamtam eh ban ïoh pyndonkam ki paidbah kiba leit sha ka Mass Bakhuid kaba dei ka Mass ban pynmynta nyngkong da u Dikon Soulus Kharpran uba dei u khun jong ka shnong Mawtawar ïa uba yn pynkyntang Lyngdoh Sohblei ha ka 20 tarik Mynta u bnai ha Cathedral Parish, Laitumkhrah
Ha kane ka sngi la don lang ki nongïalam ka shnong Mawtawar hapoh ka jingïalam u Rangbah shnong u Bah C Kharkongor, bad ki dkhot ka Parish Pastoral Committee ryngkat u Phadar Rangbah (Parish Priest), u Rev. Fr T Nonglang bad ki sister kiba la pynpaw ïa ka jingkmen kaba khraw ba la lah ban plie ïa katei ka surok ha ka por kaba biang.