Halor ka jingpyrshah ïa ka Jingpynsngew Paidbah ba shah khang lynti jong ka Shree Cement

Shillong, Nailur 22: Ki paidbah ka shnong Daistong ha ka sngi Ba-ar ki la leit sha ka jingbishar ba la khot da ka Meghalaya Human Rights Commission (MHRC) ban jubab ïa ki jingpyrshah jong ki ha kaba ïadei bad ka jingpynsngew paidbah kaba la long ha ka 19 tarik u Nohprah 2025 kaba la pynlong da ka Meghalaya State Pollution Control Board (MSPCB) halor ka Integrated Cement Plant Project jong ka Shree Cement.
La synran lang ïa ki nongshong shnong ka shnong Daistong da ki nongïalam ka Khasi Students’ Union (KSU).
Haba kren bad ki lad pathai khubor mynta ka sngi, u nongshong shnong ka Daistong, u Bah Reachingson Suchiang u la ong ba kane ka dei ka jingwan mih khmat jong ki bad mynta kin ap ïa ka hukum na ka MHRC.
U Bah Suchiang u la ong ki paidbah nong shong shnong ka shnong Daistong kila ujor sha ka MHRC naduh ka 9 tarik u Rymphang (February) 2025, ba ïa ki ym shym la shah bad shah khang lynti ha ki briew kah dur khmat ban leit sha ka jingpynsngew paidbah.
U la pyntip ba ka MHRC ka la ïa kynduh bunsien ha kaba ïadei bad kane ka case.
“Kane ka dei ka sien kaba nyngkong ba ngi wan ha ka jingpynsngew paidbah bad ngin ap ïa ka hukum jong kane ka jingbishar kaba khatduh”, la bynrap biang u Suchiang.
Lah ban kdew ba ki trai shnong, ha ka jingujor sha ka MHRC ki la kynnoh ba la thmu ban khanglad bad khang lynti ïa ki ban leit sha ka jingpynsngew paidbah ba la pynlong da ka MSPCB.