Sha u CM bad Dy.CM ïakren u MLA ka Jirang halor ka jingjia ha Maikhuli, mardor poi ki bor pahara

Shillong, Nailur 22 : U Myntri Sorkar bad MLA ka Jirang, u bah Sosthenes Sohtun, ha ka sngi Ba-ar u la ong ba u la leit sha Maikhuli hadien ka jingjia kaba la jia ha ka sngi Saitjaiñ bad u la ïa kren ïa kane ka mat bad u Myntri Rangbah bad u Symbud Myntri Rangbah ka jylla.
U la ïathuh ba hadien kane, la pynpoi mardor ïa ki pulit sha katei ka jaka ban pynthikna ïa ka jingsuk jong ki nongshong shnong.
“Ka jingwan jong nga sha Maikhuli mynhynnin ka long hadien ka jingjia kaba la jia ha ka sngi Saitjaiñ, ha kaba ki kynhun ki la wan sha Maikhuli bad pyrshang ban khang ïa ka khyrdop kaba leit sha Madan, bad ki la byrngem ruh,” ong u MLA ba dei ruh u Myntri Sorkar ka Jylla haba kren bad ki lad pathai khubor.
“Ym tang ba pyntip sha ki pulit, hynrei nga la pyntip ruh sha u Deputy Commissioner bad nga la ïoh ban ïakren bad u Myntri Rangbah bad u Symbud Myntri Rangbah ban shim ïa kane ka mat bad Assam, bad ki la phah ïa ki pulit ban pynthikna ba ki nongshong shnong kin lah ban im ha ka jingsuk,” u la ong.
U Bah Sohtun u la ong ba u la leit sha Maikhuli ha ka sngi Nyngkong ban peit ïa ka jinglong jingman bad u la pynlong ïa ki jingïakynduh bad ki nongïalam shnong, ki seng longkmie bad kiwei pat ki Rangbah Shnong na ka liang Meghalaya, ha kaba ki nongshong shnong ki pynpaw ïa ka jingsheptieng.
“Mynnin nga la leit ban peit ïa ka jinglong jingman bad ban tip ïa kaei kaba la jia bad kiei kita kiba la wan ban byrngem bad pyni bor ha katei ka jaka, ki Rangbah Shnong ki la pynpaw ba ka don ka jingsheptieng,” u la ong.
U Myntri u la ong ba ka sorkar ka kwah ba ki nongshong shnong kiba shong ha ki thaiñ khappud kin im khlem kano kano ka jingsyier.
“Na ka liang ka sorkar, ka kwah ba ki nongshong shnong kiba shong ha khappud kin im ha ka jingsuk bad lait na ki jingbyrngem, jinghiar thma ne jingshah pynbor,” u la ong.
U la ong ba ki nongshong shnong ki la dawa ruh ban don ki pulit kiba sah neh ha katei ka jaka, bad ïa kane ka jingdawa la shimkhia.
“Ki la pan ruh ban buh ïa ki pulit kiba sah neh ha katei ka jaka. Nga la ïakren bad u Symbud Myntri Rangbah uba peit ïa kane ka kam, bad u ruh u la phah ïa u SP bad DC ban lum jingtip halor ka jingjia bad ban bishar ïa ki sienjam kiba dei ban shim na bynta ban buh ïa ki pulit kiba sah neh ha katei ka jaka,” u la bynrap.
U la pynshai ba ka Madan ka hap hapoh ka shnong Maikhuli bad u la kynnoh ba ki kynhun ki la pyrshang ban shim jubor ïa ka jaka.
U la ong ruh ba ym baroh ki jingjia ha ki thaiñ khappud ki dei namar ka jingïakajia pud, namar don ki briew kiba pyrshang ban shim kabu ïa ka jinglong jingman.
“Don por ki briew ki kwah ban shim kabu bad pynlong ïa ka jinglong jingman kum ka mat jingïakajia, ki nongshong shnong ki don la ka jong ka jingsheptieng namar baroh ki briew kiba shong hapoh ka jylla jong ngi ki kwah ban im ha ka jingsuk bad kim kwah kano kano ka jingïakynad,” u la ong.
Da kaba dawa ban pynkhlaiñ shuh shuh ïa ka jingshngaiñ ha ki thaiñ khappud, u Bah Sohtun u la ong, “Kum u MLA na ka thaiñ khappud, nga don ruh ka khubor ban ai sha ka sorkar, khamtam sha ki pulit, ba ha ki thaiñ khappud ha kaba mih ki jingeh, dei ban pynkhlaiñ shuh shuh ïa ki Police Outpost bad ïa ki pulit, khnang ban pynthikna ba ki paidbah jong ngi kin im ha ka jingsuk.”
Haba kren halor ka jingïakren pud kaba dei ka kylla kaba ar, u la ong, “Na ka liang ka sorkar, ka la shim ïa ka jingkitkhlieh naduh ka kylla ba nyngkong bad nga kyrmen ruh ba ha kane ka second phase, nga kyrpad ïa ka sorkar bad na ka liang jong nga kum uba don bynta ha ka sorkar, ngan ïakren bad ka Committee ban pynsted ïa ka kam, khnang ba ki Myntri Rangbah jong baroh ar jylla kin lah ban ïakren ban pynbeit ïa ka jingïakajia pud ha kane ka kylla.”