Nongpoh, Kyllalyngkot, 18: Kawei na ka dhot jong ka SHG, ka Silme K. Marak mynta ka sngi ka la pynpaw ïa ka jingsngewkmen kaba khraw, kaba dei hadien ba ka la ioh ban ïa kren markhmat bad u Myntri Rangbah duh ka ri, u Narendra Modi lyngba ka Webcast ba la pynlong ha Training Hall ka ophis u Deputy Commissioner ka Ri Bhoi District.
Kum ban pynpaw, ki don haduh 5 ngut ki nongioh jingmyntoi lyngba ka scheme National Rural Livelihood Mission na ki 5 tylli ki jylla bad ka Silme K. Marak, na ka shnong Pilangkata hapoh ka Umling CRD Block, Ri Bhoi District, ka dei kawei na ka nongioh jingmyntoi ban ioh ïa kren markhmat bad u Myntri rangbah duh ka ri India.
Nalor ka Silme. K Marak kaba la ioh ban ïa kren bad u Myntri rangbah ka ri, u Naredra Modi, kiwei pat kiba la ioh ban ïa kren lyngba ka Webcase ki kynthup ïa M. Mallikaarjun Reddy na Telangana, Mamta Dindor na Rajasthan, Sandeep na Haryana, bad ka Kalpana Bai na Mumbai.
Kum ban pyntip paidbah ruh, kane ka jingïakren katei ka Longkmie bad u Myntri rangbah duh ka ri, ka dei ruh hadien ba ka la long kawei na ka dkhot ka SHG kaba la ioh jingmyntoi bun bha lyngba ka National Rural Livelihood Mission bad lyngba katei ka lad ioh jingmyntoi kane ka Longkmie ka la lah ban ieng hala ki jongki kjat da kaba ka la buh ïa ka karkhana pynmih umsoh, ka tyndur jingbamm ka Common service Centre bad kiwei kiwei kiba la ioh jingmyntoi ym tang ïa lade shimet, hynrei ïa kiwei ruh ki nongshong shnong hapoh ka thaiñ Pilangkata ha Ri Bhoi District.
Kane ka jingioh lad jong ka ban ieng ha la ki jong ki kjat, ka dei ruh halor ka jingshim ram jong ka na ki Bank bad kumjuh ruh na ka SHG kum ka EF, RF CIF, ba ka sa sdang ban pyntrei ïa kitei ki kam bad ka long ruh kawei na ka dkhot ka SGH kaba shitrhem bha ban ai jinghikai ruh sha kiwei ki SGH hapoh katei ka thaiñ.
Dei halor kine ki jingjop jong ka, kaba ka la ioh jingmyntoi lyngba ka National Rural Livelihood Mission, ka sorkar India ka la ibit ïa ka ban ioh ïa kren bad u Myntri Rangbah ka ri, u Narendra Modi, uba la kylli pyrthew ïa ka halor ki jingïaid lynti jongka ban ieng ha la ki jong ki kjat lyngba ka jingwan rah ka sorkar India lyngba u Myntri rangbah ïa ka National Rural Livelihood Mission.
Kum ka Longkmie kaba la ioh jingmyntoi na katei ka National Rural Livelihood Mission, mynta ka sngi hadien ba la ioh ban ïa kren markhmat bad u Myntri rangbah, ka la pynpaw ïa ka jingkhublei ba kyrpang ïa u Narendra Modi, uba la wan rah ïa kane ka lad ioh jingmyntoi ki Longkmie bad ka kyrmen skhem ruh ba baroh ki Longkmie hapoh ka ri India lada ki pyndonnkam bha ïa kane ka lad jingïarap na ka sorkar kin lah ban ieng ha la ki jong ki kjat bad kan wan rah ruh ka jingkylla ha ka liang ka roi ka par hapoh ka ri India hi baroh kawei.
