Nongpoh, K’lyngkot, 18: Ka jingkhlad ba kyndit noh ka Kong Jennyfer Joan Kylla mynta ka sngi ka la long ka jingduhnong kaba khraw ym tang ïa ka ïing ka sem jong ka, hynrei ka jingduhnong ka long ïa ka shnong ka thaw, ïa ki paidbah ka Ri Bhoi bad wat ïa ka jylla hi baroh kawei, namar kane ka Longkmie ka dei kawei na ka Longkmie kaba la noh synñiang shibun eh na ka bynta ka bha ka miat bad ka roi ka par jong ki paidbah ha ka jylla hi baroh kawei.
Kumba la pyntip da kiba haïing hasem, la ong ba ka Kong Jennyfer Joan Kylla ka la khlad noh mynta ka sngi ka 18 tarik u Kyllalyngkot, 2024, ka dei hadien ba la ban ka jingshitom hadien katto katne por bad dei haduh mynta ka sngi ba ki la khlad noh na kane ka pyrthei da kaba I la iehnoh shadien ïa ar ngut ki khun, lai ngut ki ksiew bad ïa ka ing ka sem hi baroh kawei.
Kum ban pynptip paidbah, ka Kong Jennyfer Joan Kylla ka la trei na ka bynta ki kam paidbah ha kiba bun bynta, ha kaba ka la dei ka Headmistress barim ka Nehru Memorial Secondary school Umsning, ka President barim ka Seng Kynthei Umsning, ka dkhot barim ka State Women Commission ka Meghalaya, ka Chairperson barim ka Child Welfare Committee ka Ri Bhoi, ka dei ruh ka Headmistress barim ba la shongthaid na ka Eden Academy Secondary School bad ka President ka Women Organization ka Ribhoi District (W.O.R.D).
Haba kren halor u synñiang u bynhei ba la noh sha u sup u thiar ka imlang ka sahlang, ka Kong Jennyfer Joan Kylla, ka la dei shisha kawei na ka Longkmie kaba la ai ïa kata ka jingshakri na ka bynta ka bha ka miat ki paidbah bad ruh ban kyntiew ïa ka imlang ka sahlang ha ki bynta bapher bapher lyngba ka jingbat jongka ïa ka kam nongïalam ha kitei ki bytna bapher bapher ba ka la shakri ha ka jingïaid lynti jong ka jingim tad haduh mynta ka sngi ba ka la khlad noh na kane ka pyrthie ban leit shongthaid ha Dwar u Blei.
Kum ka jingleh burom bad ka jingai burom ïa kane ka longkmie, ki bahaïing hasem ki la pyntip ba ka jingleh burom ban pyndep ïa ka met ba dang sah jong I kan long ha ka 20 tarik u Kyllalyngkot 2024 ha u lum jingtep ka Balang U Blei ha Umsning bad ha katei ka sngi kan don ka jingleh burom ba kyrpang ïa kane ka Longkmie kaba long kawei n na ka longkmie ba paw hapoh ka them Ri Bhoi halor ki kam shakri paidbah.
