Jowai, K’lyngkot 18: Ka Lympung Ki Khynnah Seng Khasi Seng Raij ha ryngkat ka Seng Raij Nongkynrih, Laskeiñ Pyllun kin pynlong ïa ka aiom lehkmen ki hep barit kaba 18 (khadphra) ha madan Seij Kynden, Nongkynrih Laskeiñ Pyllun West Jaiñtia Hills District, halor ka phang kaba ong “Ha la thymmei ban tei ïa ka lawei” ka ban long haka 20 bad 21 tarik u Kyllalyngkot 2024.
Na ka liang u Dolloi ka Elaka Jowai ma Puramon Kynjing uba long u President ka Lympung Ki khynnah Seng Khasi Seng Raij, haka jingkren sha ki lad pathai khubor ula ong ba ka jingthmu ban pynlong ïa kane ka lympung ka long shi bynta ban seng nongrim ïa ki khynnah naduh ba ki dangrit khnnang ba kin tip ban im tip briew tip Blei.
Ula ong ruh ha kane ka lympung kin don haduh 22 tylli ki Tnad Circle hapoh ka Bri u Hynñiewtrep Hynñiewskum, ha kaba kin don shibun ki prokram naduh ki jingrwai, ki jingshad tynrai, ki jingdro dur, ka jinglong jingim haka akor ka burom, ka nguh ka dem bad ki jingïalehkai Sports bapher bapher jong ki longshwa. Ha ka juh ka por yn sam khusam ïa ki nongjop ha ka 21 tarik.
Ula kyntu ïa baroh kiba wan sha kane ka lympung kin long kiba jai jai da kaba bud ryntih khlem da ïabeh haduh ban da poi ha kane ka jaka. Ula kyntu ruh ban long kiba lehkhuid haba wan sha kane ka jaka. ïa kiba ïashim bynta ha kane ka lympung u buh ka jingkyrpad ba kin wan ban sahmiet hashaw ka 20 tarik.
Ka kong Rimanda Suchiang kaba dei ka Organising Secretary jong ka Lumpung kala buh ka jingkyntu ïa baroh ki seng bapher bapher bapher hapoh ka bri u Hynñiewtrep ban kin ïawan khnang sha kane ka lympung khlem da don kano kano ka jingïasngewpher jingmut wad lada ki don napdeng ki katto katne kiba khlem ïoh ïa ki kot jingpyntip.
Ka pynpaw ka jingsngewnguh kaba khraw eh khamtam ïa kito kiba ïasnohkti lang haka ban synñiang da kaba ïarap ïa ki jingdonkam haka bun ki liang ban pynkhreh ïa kane ka lympung.
U ma Kamailang Tyngkan uba dei u Waheh Shnong bad u President Seiñ Raij Nongkynrih u buh ka jingkyntu khamtam ïa ki kali kiba wan sha kane ka lynpung ba kin long kiba kongnguh katkum ka jingpynbeit jong ki Volunteer bad ban bud ryntih ïa ki kali ha ki jaka bala pynkhreh.
Katba ïa ki kali kiba wan na ki thaiñ wah Laskeiñ, Barato, Mukroh, Khadkasla bad kiwei de kin sangeh hashaw ban poi jong ka shnong Nongkynrih da kaba wan da ki kjat haduh ka jaka ba pynlong ïa ka lympung.
