Khliehriat, K, lyngkot, 18: U samla Knerlang Phawa, uba na ka kynhun Graham’s Acadamy, East Jaiñtia Hills District, u la wanrah nam ïa ka District bad ïa ka thaiñ hi baroh kawei, namar ka jinglah jong u ban poi sha ka nam lah duh ha ka jingia mareh thong ha ka 5th Meghalaya Game 2024 kaba long ha Tura.
U samla Knerlang Phawa, mynta ka sngi ka 18 tarik u kyllalyngkot 2024, u la rah ïa ka nam lah duh, ha kaba u la wan ba nyngkong ha ka jingiamareh thong kaba 10 hajar mitar ha ka thup jong kiba 16 snem sha jrong bad 22 snem shapoh.
Ha kane kajuh hi ka sngi utei u samla uba na ka Graham’s Acadamy, u la jop bad wan ba lai ruh sa ha kawei ka jingiamareh thong bad u la ioh khur ïa ka takma rnong.
U bah Grahan Lyngdoh, uba na ka shnong Tuber Kmai-shnong, East Jaiñtia Hills District, uba dei u trai jong ka Graham’s Acadamy u la pynpaw ka jingsngew kmen halor kane ka jing lah jong u samla Knerlang Phawa, uba la wanrah ïa ka nam ka burom ym tang ïa ka Acadamy, hynrei ia ka district hi baroh kawei.
“Nga pynpaw ruh ba kane ka dei ka nuksa kaba bha watla ka long tang ka jingsdang bad ruh ka long ka jingshisha ba ka jingtrei shitom ka long kaba donkam ban kyntiew ïa kano kano ka sap bad nga kyrpad ruh ïa ki para nong shnong jong ka thaiñ hi baroh kawei ba phin sngewbha bn ai mynsiem bad ban kyrshan lem ïa ki khynnah kiba don sap kumjuh ruh ïa ka Academy khamtam eh ïa ki khun ki kti la jong khnang ba ka lawei jong ngi kan long kaba pyrnai bad ruh ban kyntiew ïa ka sap kaba ki don” ong u bah Graham Lyngdoh.
