Nongstoiñ, K’lyngkot 18: Napdeng ki shnong ki thaw baroh kiba don hapoh u pud u sam jong ka ri Khasi Jaiñtia, don tang 61 tylli ki shnong kiba hap hapoh West Khasi Hills district kiba hap hapoh ka jingpeit jingkhmih jong ar ngut ki Syiem kata ha u Syiem ka hima Rambrai bad ka hima Myrïaw.
U bah P.S.Lyngdoh u dkhot barim jong ka Executive Dorbar jong ka hima Myrïaw haba ïakren bad u nongthoh khubor, u la ong ba katkum ki jingthoh jingtar kiba don ha ka ophis jong ka hima Myrïaw, la ong ba mynshuwa eh ki don tang hynñiew tylli ki shnong kiba ki Syiem jong ki ar hima ki la ïakut ban synshar lang bad ïa baroh ki jaka ki puta bad ka khyndew ka shyiap, lem bad ïa ki jaka puta baroh kiba hap ha kitei ki jaka la khot ka joint property.
U la ong ruh ba haba kitei ki hynñiew tylli ki shnong haba ki jied rangbah shnong ïa ka Sanad ne ka syrnod, ki hap ban phah mynjur lang ha baroh ar ngut ki syiem. U la ong ruh ba hadien bun bun phew snem ka jingdon briew ka la nang kiew bad ki shnong ruh ki la nang bun, haduh ba mynta ki la don haduh 61 tylli ki shnong kiba hap ha ka joint property kiba la peit la khmih lang da ki ar Syiem.
U la ong ruh ba katei ka jingshah synshar ha ki ar Syiem ka wanrah shibun ki jingeh ha ki shnong ki thaw, hynrei na ka jingdon jong ki khatsaw tylli ki shnong ki bym kwah ban don tang ha kawei ka hima, ka pynthut ïa ka jingkwah jong kiba bun ban don noh tang ha kawei ka hima.
Namar ka jingnang kiew jong ka jingdon briew bad ka jingdon jong ki shnong, u bah Lyngdoh u la ong ba ka por ka la dei ba ki sordar bad ki riew rangbah jong ki hynriew phew wei tylli ki shnong, kin pynkynmaw biang ïa ka Executive Dorbar jong ka hima Myrïaw ïa kawei ka mat kaba u la pynsngew ha ki snem ba mynshuwa
Kata ka dei ha ka por jong u Syiem (L) Jidon Singh Syiem, ha ka por ba u dang long kum u dkhot jopng ka Executive dorbar jong ka hima Myrïaw. Nalorkata, u la ong ruh ba ka la I donkam haduh katta katta ba kitei ki hynriewphew wei tylli ki shnong, kin don noh tang ha kawei ka hima kata lada ki don ha ka hima Rambrai ruh kampher, lada kin don ha ka hima Myrïaw ruh kam pher, tangba ki dei ban dei beit ki khun ki raïot jong kawei ka hima ym shuh ar hima kumba ki long mynta.
U la ong ruh ba kawei pat ka mat kaba u la rah ha ka Executive Dorbar, ka long ba lada ki ar Syiem kim kwah ban mynjur ïa kata, ki dei ban pyllait noh ïa kitei ki hynriewphew wei tylli ki shnong na baroh ar Syiem bad kin ai noh la ka jong ka bor synshar kaba thymmai, khnang ba kin jied hi ïa ka Headquarter jong ka hima bad ban jied hi ïa u nongsynshar.
