Mawkyrwat, K’lyngkot, 18: Ka Golden Lion Football Club ha ka jingïalehkai Quarter Final kaba ar jong ka XVI Mawlangwir Invitation Football Tournament 2023 – 2024 ka la pynliem noh pyrshah ïa ka Langsning Football Club da 1 – 0 kol ha madan Rowell Lyngdoh Stadium, Mawlangwir, South West Khasi Hills District.
Hapdeng ka jingïakhun bad ki minit ruh ki la nang ïaid, na ka liang ka Golden Lion FC ruh ka ïa khun tyngeh bad ka la ïoh ban thep ïa ka kol ba nyngkong ha ka kyllastep da u Hikai Bareh. Kumta haduh kaba kut jong ka jingïalehkai ka Langsning FC kam shem la lah ban pynphai shuh bad pynlong ïa Golden Lion FC ban ïoh ïa ka nam jingjop bad rung sha ka semi final.
Ha kane ka sngi na ka liang ka Mawlangwir Sports Club ka la ai khusnam nongialehkai ba tbit T. 5 hajar tyngka ïa u Hikai Bareh. Ka Quarter Final kaba Lai kan long ha ka 2 tarik Rymphang, 2024 hapdeng ka MLP pyrshah ïa ka KMC Sonapur ha ka por 1 baje nohphai sngi.
