Pynlong awareness prokram ka tnat Wildlife Umkiang ban pynneh pynsah ïa ki jait miaw bad kiwei kiwei ki jait mrad

Khliehriat naiwieng 23: Ka ophis jong u Range Forest Officer Umkiang- Khliehriat Wildlife Range ka la pynlong ïa ka prokram ai jingpynshai lane ka awareness prokram ha ki saw tylli ki shnong ha Narpuh, East Jaiñtia Hills District, ha shnong Lumshnong, ha Sakhri, ha Shymplong bad ha Sonapyrdi, ha kane ka prokram la pynshai bad pynsngewthuh ba donkam ban pynneh pynsah ïa ki jait miaw bad kiwei kiwei ruh ki jait mrad bad ruh ban pynneh pynsah ïa ka mariang.
La wan ban ai jingpynshai da u Senior Biologist, Wildlife Wing, Shillong, u Nibir Medhi, ki Field Biologist, Wildlife Wing, Shillong, u bah Aiborlang Sawian bad u bah Aldrinsius Kharkongor, ki la batai bad pynshai ruh shaphang ki jait miaw khlaw kiba don ha Meghalaya ba kynthup ki miaw khlaw kiba rit, ki Asiatic Golden Cat, ki Marbled Cat, ki Clouded Leopard, ki miaw khlaw kiba heh kum ki Leopard bad kiwei kiwei, ha kajuh ka por, ki la kyntu ruh ïa ki nongshong shnong ban pynneh pynsah ïa ki khlaw ki btap bad ïa ka mariang sawdong, na ka liang u bah Aiborlang Sawiang, u la ong ïa ki nongshong shnong jong ka Sonapyrdi ba ki long kiba donbok ba ki iohi markhmat ïa kane ka khlaw Narpuh kaba rben ba itynnad kaba pynmih ïa ka lyer kaba khuid ban ring mynsiem, ka um kaba khuid, u kyntu ba ki dei ban pynneh pynsah ïa kine ki khlaw.
Kitei kiba la ai jingpynshai, ki la pyni dur ruh ïa ki jait mrad kiba don ha ka khlaw Narpuh bad kiba don ha kiwei kiwei ki khlaw kiba don hapoh ka jylla Meghalaya, ki jiat mrad kiba la ioh ban ring dur lyngba ki kor ring dur (camera), ki don ruh ki jait mrad kiba la jan duh jait kiba donkam ban pynneh pynsah ïa ki.
Ha kajuh ka por, ki la batai ruh shaphang ka jingkylla ka mariang ne ka jinglong ka suiñ bneng (Climate Change) bad ki daw kiba hakhmat eh kiba wanrah ïa ka jingkylla ka mariang, kum ka jing pynmih ïa ka lyer jakhlia, ka jingpom pathar ïa ki khlaw ki btap bad kiwie kiwei.
Na ka liang u RFO/Ranger/Range Forest Officer incharge Umkiang Wildlife Range Khliehriat, u bah Shanbormiki Law, u la ai ka jingkren maitphang halor ka phangpdeng jong kane ka prokram ai jingpynshai kaba iadei bad ka phang ban pynneh pynsah ïa ki jait miaw bad kiwei kiwei ki jait mrad, u la kyntu ruh ïa ki nongshong shnong ba ym dei ban siat pathar bad pyniap pathar ïa ki mrad kiba don ha khlaw, u la ong ruh ba ka sorkar pdeng ruh ka la dep pyntreikam ïa ki aiñ ban iada ïa ki mrad ‘Wildlife Protection Act’ ba kino kino kiba pyniap pathar ïa ki mrad kin shah pynshitom katkum ka aiñ bad yn set patok bad kumjuh ruh kin ngat ha ka jingshah daiñ kuna, u la pynkynmaw ruh ïa ki kmie ki kpa ba ki dei ban pynsngewthuh ïa ki khun ki kti ba kim dei ban pyniap pathar ia ki mrad bad ym dei ban pynjor ia ka mariang, u la ai khublei ïa baroh ki nongshong shnong kiba ju ai ka jingiatreilang bad ka tnat Wildlife.
U secretary Shnong Sonapyrdi, u bah Daiapherbha Lamare, u la kyntu ïa ka tnat Wildlife ba kan sngewbha ban iarap lem ïa ki nongshong shnong lada ki shah pynjulor ïa ki mar rep jong ki ha ki mrad, namar 70 percent na ki nongshong shnong ki dei kiba im da ka rep ka riang bad lada ki mrad ki wan pynjot kan long ka jingduh ïa ki nongrep, u kyntu ïa ki heh jong ka wildlife kiba don ha ka thaiñ ba kin sngewbha ban pynsngew lem ïa kane ka jingeh ki paidbah sha ki heh jong ka tnat Wildlife.
Haba kren sha ki nongshong shnong, u bah Daia u kyntu ïa ki paidbah ban pynneh pynsah ïa ki khlaw ki btap bad ki mrad kiba don ha khlaw bad ong ruh ba ka shnong ka don ka thong ban kyntiew ïa ka kam jngohkai pyrthei, ka Eco Tourism bad halor kane ka shnong ka iatreilang bad ka tnat Wildlife.
Kiba la ai jingkren ki kyntup ruh u Assiatnat Waheh Shnong Sonapyrdi, u bah Standing Lamare, u bah S.P.Lamare, uba dei u Fr-I Beat Forest Officer, I/ C Ratachera wildlife beat, u bah M.Syrpuh, uba dei u Fr-I, Beat Forest officer, I/c Sonapur wildlife beat, u bah E Suchiang bad u bah S.Susngi, kiba dei ki Fr-I, Beat forest officer I/c Khaddum wildlife beat.