Guwahati: Hapoh ka jingkyrshan ka State Support Mission jong ka NITI Aayog, ka Women Entrepreneurship Platform (WEP) ka la pynkhreh ban pynlong ïa ka workshop kaba ar ha ka jingïatreilang bad ka Sorkar Arunachal Pradesh. Kane ka Workshop kan long ha Dorjee Khandu State Convention Center, Itanagar ha ka 24 tarik Naiwieng 2023 naduh ka por 9:30 mynstep. Ha kane ka workshop yn ïadonlang ki longkmie kiba seng kam lajong kynthup ki SHG, ki cluster bad ki kynhun, ki nongïalam na ka Sorkar bad ki nongmihkhmat na ki kam shimet.
Kane ka workshop kadei shi bynta jong ka jingsdang ïa ki jingïalang jong kito kiba don bynta ha kane ka kam na ka bynta ban pynkhlaiñ ïa ki kam ba ïalam da ki longkmie jong ka thaiñ shatei lammihngi. Ka thong ba hakhmat eh kalong ban kyntiew ka jingai jingtip ba ïadei bad ka WEP bad ka jingpyllait ïa ki sienjam bapher bapher ba ka WEP ka la sdang. Kine ki sienjam ki kynthup ka prokram ‘Maitri’ jong ka MakeMy Trip ban pynkup bor ïa ki longkmie kiba long ki trai jong ki homestay ha ka thaiñ shatei lammihngi, ka prokram jong ka AIC-SELCO bad ka WEP ban kyrshan ïa ka jingseng kam lajong ha ki kam kiba ïadei bad ka bording ka bym pynmih jaboh, bad kiwei kiwei ki jingïatreilang.
Ha kane ka workshop kan don ki jingïamir jingmut halor ki phang kum ka jingryntih kyrdan ki shynrang bad kynthei, ki kam ïalehkai bad ka jingseng kam lajong, ki jingïatreilang ka Sorkar bad ki briew, ki kynhun shimet. Ka jingkyrshan na ki polisi, bad ka jingbud ïa ki aiñ ki kyndon – katkum ki jinglong jingman ka thaiñ shatei lammihngi.
Ha kane ka workshop yn don ki nongkren ba pawkhmat kum u Pema Khandu, Myntri Rangbah jong ka Arunachal Pradesh, u Dharmendra, Chief Secretary, Sorkar Arunachal Pradesh, Dr. Chintan Vaishnav, Mission Director jong ka Atal Innovation Mission ha ka NITI Aayog. Ki delegate na ka Tnat DoNER, DPIIT, FICCI, NASSCOM, Indian Institute of Entrepreneurship, UNDP, Mastercard, IndusInd, PayTm, bad kiwei kiwei ki ban ïashim bynta ha kane ka prokram.
Kane ka workshop kan plie lad ïa ki longkmie kiba seng kam lajong ban ïoh jingtip, ban ïasam ïa ki jingshem jong ki, ki jingai jingmut ba ka jingïoh ïa ki jingdon jingem bad ka jingkyrshan. Shuh shuh, kan long ruh ka rynsan kaba biang ïa ka Sorkar bad ki kynhun shimet ban pyni ïa ka jingkut jingmut jong ki ban kyntiew ïa ki longkmie kiba seng kam lajong ha ka thaiñ shatei lammihngi bad ban wanrah ïa ki jinglong jingman ba kham plié lad ha ki jingseng kam lajong.
Shaphang ka WEP:
Ka WEP kadei ka rynsan kaba plié lad ïa ka roi ka par ba ïalam lynti da ki longkmie lyngba ka jingseng kam lajong. Ïa ka WEP la wanrah hapoh ka Niti Aayog da ka jingthmu ban kyntiew ïa ka jingseng kam lajong da ki longkmie ka India. Ka pynbiang ïa ka rynsan ïa baroh kiba ïadon bynta ha kine ki kam na ka Sorkar, ki kam khaii pateng, ki kam sngewlem bad ki kam ha ka imlang sahlang ba kin ïawan lang ban ïatrei lang bad pynïahap ïa ki sienjam jong ki na ka bynta ki prokram ba lah ban pynheh bad kiba kham seisoh. Ka WEP ka don ka jingïatreilang jong palat 50,000 ngut ki longkmie ba seng kam lajong ha kane ka rynsan bad palat 50 ngut ki nongïatreilang ha kane ka kam.
Ka State Support Mission, kadei ka sienjam jong ka NITI Aayog, kaba la saiñdur ban kyrshan ïa ki jylla bad ki union territory ban kot sha ki thong ha ka imlang sahlang bad ka ïoh ka kot jong ki hashuwa u snem 2047. Hapoh ka State Support Mission, la pynlong ïa ki workshop ban plie ka rynsan na ka bynta ki jingïatreilang ka Sorkar Pdeng bad ki Sorkar Jylla ban wanrah ïa ki jingïatreilang.
