Ha KATC&ETM wan shah hikai ki NCC ka Nongstoiñ College: Zip-lining, Rappling, Rope Knot, Jumaring
Mawkyrwat, ‘Naiwieng 23: Ki samla pule jong ka Nongstoiñ College, West Khasi Hills District kiba dei ruh ha kajuh ka por ki National Cardet Crops (NCC) mynta ka sngi ka 22 tarik ‘Naiwieng, 2023 ki la ïoh shibun ki jingmyntoi na ka bynta ban shah ha ka jinghikai ba shi sngi ban pyntbit ïa lade na ka bynta kumno ban tip ha kiba bun ki bynta ha ka prokram ba la pynlong ha Kynrewmyllah Adventure Training Centre and Eco-Tourism, Mawranglang (KATC&ETM), South West Khasi Hills District.
Ïa katei ka prokram ba shi sngi ka dei hapoh ka jingpynïaid jong u bah Pilastar Nongsiej uba dei u National Mountaineering Climber ha kaba u la ai shibun bah ki jinghikai ïa ki samla pule jong ka Nongstoiñ College bad ha kane sngi la hikai ïa ki ha ka bynta u Zip-lining, Rappling, Rope Knot, Jumaring.
U bah Pilastar Nongsiej haba kren ha ka jingïalang ba lyngkont u la ong ba ka jingthmu jong u ban buh ïa kane ka jaka ai jinghikai ne ka Kynrewmyllah Adventure Training Centre and Eco-Tourism ka long kum shi bynta ban kyntiew ïa ki samla jong ka dong ka thaiñ bad ruh ïa ka jylla Meghalaya hi baroh kawei kumba ma u hi u la long kum uta u National Mountaineering Climber uba kwah ba kiwei ruh kin kyntiew lem ha kum kine ki kam sports.
“Da kabab uh kumne, kam dei eh tang ka jingïoh nong jong nga shimet hynrei lada ki samla kiba la ïoh ban ai jinghikai ka long kum shibynta ban pynïoh kam pynioh kam ïoh jam ruh ïa ki lada ki nang ban pyndonkam”, ong u bah Piles. Shuh shuh u la ong ruh ba ka jingthmu jong u, kam kut tang hangne hynrei u da thrang kumno ban pynjanai shuh shuh ha kaba ïa dei bad kane kam ba u trei bad lada long kaba lah, u kwah ruh ban pynlong ïa kane ka KATC&ETM kum kawei ka jaka ai jinghikai kaba bha tam ïa ki samla hapoh ka South West Khasi Hills District bad ïa kiwei kiba don ka mynsiem bad ka jingthrang ban kyntiew ïa ki kam jngohkai ha ki rukom bapher bapher.
Lah ban kdew ba ïa ki NCC jong ka Nongstoiñ College la ïalam da u babu Rubenker Nongrum, Associate NCC Officer jong ka Nongstoiñ College ha kaba ma u ruh u la pynpaw ka jingïaroh ba lyngba ka jingïoh jinghikai na u bah Pilastar Nongsiej ba lyngba jong u ngi la ïoh shibun ki jingmyntoi khamtam na bynta ki NCC jong ka kolej.