Pynliem ka Khalsa Warriors ïa ka Matrisangha ha ka SCL 1st Division 2024-25

Shillong, Kyllalyngkot 31: Ka Khalsa Warriors ka la lah ban pynliem da 84 ron ïa ka Matrisangha CC ha ka lympung Shillong Cricket League 1st Division 2024-25 jong ka Shillong Cricket Association ba la long hynne ka sngi Thohdieng.
Ka Khalsa Warriors ka la rai ban tied nyngkong hadien ba jop ïa ka toss bad ka la lah ba kan kynjoh 206 ron haduh kaba kut jong ka 40 over ba la mang bad hap 9 wiket. U Aditya Mahala u la long u ba seisoh tam ha ka tied da kaba kamai 117 ron naki 97 bol, katba u Sawan Singh u la kamai 12 ron naki 18 bol.
Ar ngut ki rangkawangbol jong ka Matrisangha CC ba kynthup ïa u Mintu Medhi (7 over: shah tied 49 ron) bad u Kishor Bhowmik (8 over: shah tied 30 ron) ki la ïoh ban khur 3 wiket.
Haba jubab ka Matrisangha ka la shah pynkut noh da tang 122 ron naba shah pynhap baroh 10 wiket naki 28.3 over. Na ka liang jong u Sajan Maghaiya u la kamai 36 ron naki 33 bol, katba u Snehal Dutta u la kamai 23 ron naki 41 bol.
Napdeng ki rangkawang bol, u Sawan Singh naki 7 over u la ailad tang 34 ron bad khur 5 wiket, katba u Kushaldeep Singh naki 5 over u la ailad tang 20 ron bad khur 2 wiket. Ha kaba kut ka Khalsa Warriors ka la jop da 84 ron bad ïa ka nam “Player of the match” la khur da u Aditya Mahala uba la kamai 117 ron ha ka tied bad khur 1 wiket ha ka bol.